उपत्यकामा निषेधाज्ञामा आजबाट कडाइ

काठमाडौँ - काठमाडौं उपत्यकामा कोभिड-१९ संक्रमण पुनः बढ्न थालेपछि स्थानीय प्रशासनले निषेधाज्ञालाई थप कडाइ गरेको छ । उपत्यकाका तीन जिल्लाका प्रमुख जिल्ला अधिकारीहरूको बैठकले बिहीबार राती ८ बजेपछि सबै प्रकारका सवारीसाधन चलाउन रोक लगाएको छ । ठाउँ ठाउँमा सुरक्षाकर्मी बसेर कडा जाँच गरेका छन् । 

भदौ ८ गतेसम्म निषेधाज्ञा अवधिमा सबै प्रकारका सभा, सम्मेलन, पार्टी प्यालेस, सिनेमा हल, डान्सबार, दोहोरी, नाचघर, क्लब, स्वीमिङ पुल, मनोरञ्‍जनस्थल, संग्रहालय, रंगशालामा हुने दर्शकसहितको खेलकुद र मानिसहरुको भीडभाड हुने अन्य कार्यक्रम सञ्‍चालन गर्न गराउन नपाउने उल्लेख छ ।

यस्तै चोक, खुला स्थानमा मानिसहरु भेला हुन, भीडभाड गर्न, सभा जुलुस, जात्रा, महोत्सव, भोज भतेर आदि गर्न नपाउने व्यवस्था जिल्ला प्रशासन कार्यालयद्वारा जारी निषेध आदेशमा उल्लेख गरिएको छ ।