राप्रपा अध्यक्ष कमल थापाको पुस्तक विमोचन

काठमाडौँ – राष्ट्रिय प्रजातन्त्र पार्टी (राप्रपा) का अध्यक्ष कमल थापाद्वारा लिखित ‘एक पटकको सैनिक जीवनभरको सैनिक’ नामक पुस्तक सार्वजनिक भएको छ । काठमाडौँमा बिहीबार आयोजित एक कार्यक्रमबीच प्रधान सेनापति पूर्णचन्द्र थापाले पुस्तक विमोचन गरेका हुन् । 

अध्यक्ष थापाले आफ्नो जीवनयात्राको आदर्श र प्रेरणादायी व्यक्तित्व पिता अर्थात् अवकाशप्राप्त कर्णेल छत्रबहादुर थापाकाबारेमा पुस्तक लेखेका हुन् । छत्रबहादुर थापा स्मृति ट्रष्टको वार्षिकोत्सवको अवसर पारेर पुस्तक सार्वजनिक गरिएको बताइएको छ ।

पुस्तकमा लेखक थापाले तत्कालीन नेपालको सामाजिक, सांस्कृतिक र राजनीतिक परिवेशको चित्रण गर्दै आफ्ना पिताको जीवनकालमा घटेका घटनालाई समेटेका छन् । पुस्तकमा छत्रबहादुर थापाको  विश्वयुद्धमा सहभागिता, राणा प्रधानमन्त्री मोहनसमशेर र राजा महेन्द्रसँगको समीप्य तथा पञ्चायतकालका अनुभवहरू पनि रहेका छन् ।