प्रदेश-२ का सांसदहरूले फिर्ता गरेनन् दसैं भत्ता

फाइल तस्बिर

जनकपुरधाम : प्रदेश-२ का सांसदहरूले कोभिड-१९ महामारीलाई आफूहरूका बैंक खातामा आएको दसैं भत्ता फिर्ता गर्ने घोषणा गरेका थिए । तर, आफूहरूको घोषणा उनीहरूले एक महिना वित्दासम्म पनि पूरा गरेका छैनन् । 

महामारीको बेलामा पनि सांसदहरूले दसैं भत्ता लिएको भन्दै चर्को आलोचना भएपछि सांसदहरूले पार्टीको निर्देशनानुसार दसैं भत्ता फिर्ता गर्ने घोषणा गरेका थिए । सुरुमा मधेस केन्द्रित दल जनता समाजवादी पार्टीले कात्तिक ३ र ४ गतेको बैठकबाट प्रतिनिधिसभा र प्रदेशसभा दुवैमा प्रतिनिधित्व गर्ने पार्टीका सांसदहरूले दसैं भत्ता फिर्ता गर्ने घोषणा गरेको थियो । त्यसपछि नेकपा र नेपाली कांग्रेसका सांसदहरूले पनि पाएको दसैं भत्ता फिर्ता गर्ने घोषणा गरेका थिए ।
 
चाडपर्व खर्चबापत सांसदहरूले ५६ लाख २४ हजार ७७५ रुपैयाँ बुझेका थिए । प्रदेशसभा सचिवालयका सचिव रंजितकुमार यादवले घोषणा गरे अनुरुप सांसदहरूले रकम फिर्ता नगरेको बताए । फिर्ता गर्ने मौखिक प्रतिवध्दता व्यक्त गरे पनि कहाँ र कसलाई फिर्ता गर्ने भन्‍ने अन्यौलले रकम फिर्ता हुन नसकेको सचिव यादवले बताए । 

सचिवालयकाअनुसार मन्त्री, संसदीय दलका नेता र प्रमुख सचेतक बाहेक प्रदेशसभाबाट ९४सांसदमध्ये ८८ सांसदले दसैं भत्ता बुझेका छन् । बाँकी अन्य ६ जना सांसदले प्यान नम्बर र बैंक खाता नबुझाएकाले दसैं भत्ता बुझेनन् । उनीहरूको तलबसहितका सेवा सुविधा पनि सचिवालयले रोकेको छ ।

सचिवालयले प्रदेशसभाका सभामुखले ६८ हजार ४ सय ८०, उपसभामुखले ६७ हजार २५, सांसदहरूले ६१ हजार २०, सत्ता पक्षका प्रमुख सचेतकले ६५ हजार ५ सय ३०, दलको नेताले ६५ हजार ५ सय ३०, दलका सचेतकले ६१ हजार ४ सय ८०, सत्ता पक्षका सचेतकले ६७ हजार २५ रुपैयाँ दसैं भत्ता बुझेको जनाएको छ । त्यस्तै प्रमुख प्रतिपक्षी दलको नेता ६७ हजार २५ र प्रमुख सचेतकले ६५ हजार ५ सय ३०, संसदीय समितिका सभापतिले ६५ हजार ५ सय ३० रुपैयाँ दसैं भत्ता बुझेको सचिवालयले जनाएको छ । 

सत्तारुढ तात्कालिन राष्ट्रिय जनता पार्टीका प्रमुख सचेतक परमेश्वर साहले पार्टीको निर्णय अनुसार आफूहरूले दसैं भत्ता फिर्ता गर्ने भनेपनि कहाँ पठाउने भन्‍ने अन्यौल भएकोले हालसम्म फिर्ता गर्न नसकिएको बताए । उक्त रकम कुन कोषमा फिर्ता गर्ने भन्ने यकिन भएपछि रकम फिर्ता गर्ने उनले बताए ।

त्यस्तै तात्कालिन समाजवादी पार्टीका प्रमुख सचेतक शैलेन्द्र यादवले पनि रकम कहाँ फिर्ता गर्ने भन्‍ने अन्यौलताले आफूहरूले रकम फिर्ता गर्न नसकेको बताए । उनले सबै दलको सहमति अनुसार जुन कोषमा रकम पठाउने निर्णय गरिन्छ त्यसमा आफूहरूले बताए ।

प्रमुख प्रतिपक्षी दल नेकपा संसदीय दलका नेता सत्यनारायण मण्डलले पनि कोष यकिन नभएकोले फिर्ता गर्न नसकको बताए ।