भारतमा फिल्म हल खुले, खुलेनन् दर्शक

मुम्बई : भारतमा सात महिनायता बन्द सिनेमा हल शुक्रबारबाट खुले । केन्द्र सरकारले  बिहीबारदेखि नै हल खोल्ने अनुमति दिएको थियो । यसको आधारमा बिहीबारै पनि केही सिनेमा हल खुले ।  महामारीको अवस्था हेरी राज्य सरकारले खोल्ने नखोल्ने निर्णय गर्न पाउने अधिकार पनि केन्द्र सरकारले दिएको थियो । यही अधिकार प्रयोग गरी महाराष्ट्र सरकारले हल खोल्न दिएको छैन । जबकि हिन्दी भाषी सिनेमाका लागि यो सबैभन्दा ठूलो बजार मानिन्छ । बलिउडको मुटु मानिने मुम्बईसमेत यही राज्यमा पर्छ ।

२ सय दिनदेखि मानिसहरू घरमा थुनिएका थिए । धेरैको अनुमान थियो, घरबस्दा बस्दा वाक्क भएका मानिस हल खुल्ने बित्तिकै त्यता दौडन्छन् । तर, पहिलो दिन त्यस्तो कुनै लक्षण देखिएन । मल्टिप्लेक्स हुन् वा सिंगल थिएटर, दुवैमा १५ जनाभन्दा बढी दर्शक नआएको हलले रिपोर्ट दिए । तर, यो दर्शक संख्या अनपेक्षित नरहेको फिल्म विश्लेषकले  बताएका छन् । विश्लेषकहरू भन्छन्, ‘सिनेमा हल साघुँरो ठाउँ हो । भाइरसबाट संक्रमित हुने डर अझै मानिसहरूको मनबाट जान सकेको छैन ।’

मनोरञ्जन भारतमा पनि गाँस, बाँस र कपासपछि मात्र प्राथमिकतामा आउने चिज हो । लामो लडडाउनका कारण मानिसको खर्च गर्ने क्षमतामा पनि व्यापक कटौती आएको छ । गाँसकै लागि संघर्ष गरिरहेको समयमा मानिसहरू मनोरञ्जनका लागि हल जाने ‘मुड’मा छैनन् । भारतमा मात्र होइन विदेशतिर पनि गत महिना ‘टेनेट’ र ‘मुलान’ रिलिज हुँदा हलमा दर्शकको चाप देखिएको थिएन ।

नयाँ तथा स्टारकास्टले भरिएका फिल्म रिलिज नहुँदा दर्शक हलमा नदेखिने हल सञ्चालकको अनुमान थियो । भयो पनि त्यस्तै । शुक्रबार रिलिज भएका मध्ये केही सिनेमा पहिला रिलिज भएर उत्रिसकेका हुन् भने केही सिनेमा ओटिटी (ओभर दि टप प्लेटफर्म) मा रिलिज भइसकेका हुन् । राम्रा र नहेरेकै सिनेमा भए पनि ‘रिपिट’मा चलेका सिनेमामा दर्शक झुम्मिन्नन् । यसमा कतिपय मल्टिप्लेक्सले त ओटिटीमा आइसकेका सिनेमा आफूहरूले चलाउँदै नचलाउने घोषणा गरेका थिए ।

दर्शकले यो समयमा हल खुलेको–नखुलेको पनि जानकारी पनि पाएनन् । भारतमा नयाँ फिल्म रिलिज हुँदा हलले पत्रिका वा अनलाइनमा चल्ने फिल्म र सो समयको राम्रै विज्ञापन गर्छन् । तर, शुक्रबार कुन फिल्म चल्दैछ, दर्शकले पत्तै पाएनन् । भर्चुअल प्रिन्टिङ फी (भिपिफी) को विवादका कारण खोल्ने अनुमति पाए पनि कतिपय हल खुलेका छैनन् । निर्माताले नयाँ परिस्थितिमा भिपिफी चार्ज हलले नै बेहोर्नु पर्ने सर्त अगाडि सारेपछि हल संचालक, हल खोल्न हच्किएका छन् ।

फिल्म इन्कोडिङ गरेवापत् निर्माताले ३ सय देखि ५ सयसम्म प्रति सो हललाई बुझाउनु पर्छ । कतिपय अवस्थामा भने यो पैसा स्क्रिनका हिसाबले पनि बुझाउने प्रचलन छ । यसका लागि निर्माताले प्रतिहप्ता २२ हजारदेखि २५ हजारसम्ममा एउटा फिल्मको बुझाउँछन् । इन्कोडिङ गरेर कोड जेनेरेट गरेको पैसा भने निर्माताले युएफओ र क्युबजस्ता कम्पनीलाई एकमुष्ट बुझाउँछन् ।

दर्शक हलमा बोलाउन सिनेमा हलले टिकटदर कम गर्नुपर्ने धेरैको राय छ । मल्टिप्लेक्समा टिकटदर ९९ सय कायम गर्ने हो दर्शक हलसम्म तान्न सकिने उनीहरूको तर्क छ । यति हुँदा हुँदै पनि नयाँ फिल्म रिलिज नहुँदासम्म दर्शक चाप देखिने सम्भावना छैन । तर, सबै सिट भरिने गरी दर्शक आउने वातावरण नबनेसम्म निर्माता पनि नयाँ फिल्म रिलिजका लागि ‘रिस्क’ लिन तयार देखिन्नन् ।

शुक्रबारबाट भारतमा ‘खाली पिली’, ‘केदारनाथ’, ‘तान्हाजी’ ‘सुरज पे मंगल भारी’, ‘पिएम नरेन्द्र मोदी’, ‘थप्पड’, ‘शुभमंगल ज्यादा सावधान’,‘ मलंग’ आदि बलिउड फिल्म रिलिज भएका छन् । शुक्रबार नै केही हलिउड फिल्म पनि रिलिज भएका थिए ।