सगरमाथाको उचाइ मंगलबार घोषणा गर्ने तयारी

काठमाडौं : नापी विभागले मंगलबार सगरमाथाको उचाइ घोषणा गर्ने तयारी गरेको छ । घोषणा गर्ने औपचारिक मितिबारे टुंगो सोमबार लाग्‍ने विभागले जानकारी दिएको छ । 

सूचना अधिकारी दामोदर ढकालले इकागजलाई दिएको जानकारी अनुसार सकेसम्म मंगलबार नै घोषणा कार्यक्रम राख्‍ने गरी तयारी विभागले गरिरहेको छ । उनले भने, 'केही काम अझै बाकी नै रहेकाले मंगलबार औपचारिक घोषणा गर्ने निश्‍चित छैन । तर, तयारी भने सोहीअनुसार गरिरहेका छौं । भोली (सोमबार) टुंगो लगाएर घोषणा मिती तय गर्नेछौं ।'

मंसिर १० मा बसेको मन्त्रिपरिषद् बैठकले भूमि व्यवस्था, सहकारी तथा गरिबी निवारण मन्त्रालयलाई सगरमाथाको उचाइ घोषणा गर्न अनुमति दिएको थियो । 
गत वर्ष चीनका राष्ट्रपति सि चिङफिङको नेपाल भ्रमण क्रममा सगरमाथाको उचाइ संयुक्त रूपमा घोषणा गर्ने सहमति भएको थियो । सोहीबमोजिम नेपाल र चीनका सरकारी टोलीले संयुक्त रूपमा काम गरेका थिए ।

यसअघि नेपालले सगरमाथाको उचाइ‌ मापन गरेको थिएन । नेपालले आफ्नै स्रोतसाधनले सगरमाथाको उचाइ मापन गरेको यो पहिलोपटक हो । पछिल्लो पटक सर्वे अफ इण्डियाले सन् १९५४ मा मापन गरी कायम गरेको विश्‍वको सर्वोच्च शिखर सगरमाथाको उचाइ ८ हजार ८ सय ४८ मिटर हालसम्म कायम छ।