चार कम्पनीको कारोबार ५० करोड रुपैयाँ माथि

काठमाडौँ– दोस्रो बजारमा सूचीकृत कम्पनीहरूको सेयर मूल्य मापन गर्ने नेपाल स्टक एक्स्चेन्स (नेप्से) परिसूचक सोमबार सीमान्त १.५४ अंकले उकालो लागेर ३,१०९.६६ बिन्दूमा पुगेको छ । ‘क’ वर्गका कम्पनीहरूको सेयर मूल्य घटेपछि सेन्सेटीभ इन्डेक्स २.०५ अंकले आरालो लागेको छ । 

सोमबार नेप्सेमा कारोबार भएकामध्ये १०० कम्पनीको सेयर मूल्य ओरालो लाग्यो भने ७९ कम्पनीको सेयर मूल्य बढेको छ । ६ कम्पनीको सेयर मूल्य भने अपरिवर्तित रह्यो । 

बजार खुल्लेबित्तिकै बजार बढ्दो क्रममा देखियो र केही कम्पनीहरूको कारोबारमा सर्किट ब्रेकर लागेको छ । आइसीएफसी फाइनान्स, कर्पोरेट डेभलपमेन्ट बैंक, हिमालयन पावर पार्टनर, नेपाल हाइड्रो, युनियम हाइड्रोपावर र हालै सूचीकृत जीवन विकास लघुवित्तको सेयरमा सर्किट ब्रेकर लागेको हो । 

समूहगत परिसूचक हेर्दा जलविद्युत्, वित्त कम्पनी, निर्जीवन बिमा कम्पनी, जीवन बीमा कम्पनी तथा नेपाल इन्फ्रास्ट्रक्चर बैंक (निफ्रा) र नेपाल टेलिकम समेतको सेयर सूचीकृत रहेको अन्य समूहका परिसूचक मात्र उकालो लागेका छन् । 

चार ओटा कम्पनीको ५० करोड रुपैयाँ माथिको कारोबार भएको छ । अरुण भ्याली हाइड्रोपावरको ६७ करोड ४८ लाख मूल्यको १० लाख ८० हजार कित्ता, माथिल्लो तामाकोसीको ५८ करोड ९९ लाख रुपैयाँ मूल्यको ७ लाख ३१ हजार कित्ता, अपि हाइड्रोपावरको ५३ करोड ८० लाख मूल्यको ८ लाख ५५ हजार कित्ता र सिनर्जी पावर डेभलमपेन्ट लिमिटेडको ५० करोड ४५ लाख रुपैयाँ मूल्यको ६ लाख ४५ हजार कित्ता सेयर कारोबार भएको छ । 

धेरै कारोबार हुने कम्पनीहरूमध्ये माथिल्लो तामाकोसीको चार हजार नौ सय ६६, अपिको ४ हजार दुई सय १४, अरुण भ्यालीको ४ हजार एक सय ६१ तथा सिनर्जीको ३ हजार ६ सय ८९ ओटा कारोबारबाट उक्त परिमाणमा सेयर खरिद–बिक्री भएको थियो । 

सोमबार २२४ कम्पनीका १४ अर्ब १३ करोड ७३ लाख रुपैयाँ मूल्यका २ करोड ५३ लाख ९३ हजार ६ सय ९९ कित्ता सेयर एक लाख २८ हजार नौ सय ५९ ओटा कारोबारबाट खरिद–बिक्री भएका छन् ।