मठमन्दिरको भिडले पनि बढ्यो कोभिड संक्रमणको जोखिम

कैलाली- कोभिड संक्रमणको तेस्रो लहरको त्रासकैबीच स्वास्थ्य मापदण्ड तथा सावधानीसमेत नअपाउँदा जोखिम बढिरहेको छ। सरकारले कुनै पनि खालका भिडभाड नगर्न आग्रह गरे पनि त्यसलाई वास्ता नगर्दा जोखिम बढिरहेको हो । अहिले साउन महिना । हिन्दु महिलाहरूले शिव भगवानको पुजा आजा गरेर धुमधामका साथ मनाइरहेका छन् । पशुपतिलगायत ठूला शक्तिपीठ बन्द भए पनि देशका अन्य मठमन्दिरहरू भने खुला नै छन् ।  

श्रावण महिनाको सोमबार शिवालयमा भक्तजनको उपस्थिति अन्य दिनको तुलनामा निकै बढी नै हुन्छ । सोमबार त्यस्तै भिडभाड कैलालीको धनगढी उपमहानगरपालिका १६ उर्मामा रहेको बेहडाबाबा मन्दिरमा पुजाआजा गर्न आउनेहरुको देखियो ।

न कुनै सुरक्षाको मापदण्ड थियो । न, त मन्दिर व्यवस्थापनबाट सुरक्षाको मापदण्ड अपनाइएको पाइयो । भक्तजनहरू बिना मास्क सामाजिक दुरी कायन नै नगरी पुजाआजा गर्नमा व्यस्त देखिन्थे। धनगढी ५ बाट स-परिवार पुजाआजा गर्न बेहडाबाबा पुगेका धर्मराज जोशीले आफूले लाइनमा नबसी मन्दिर बाहिर घुमेर फर्केको बताए ।

जोशी मात्रै होइन बेहडाबाबा दर्शन गर्न पुगेकाहरु मन्दिर व्यवस्थापन समितिले सामाजिक दुरी कायम नगरी मन्दिरमा पुजाआजा गर्न मन्दिर खुला गरेकोमा आपत्ति जनाइरहेका थिए ।  बेहडाबाबा मन्दिर व्यवस्थापन सेवा समितिका सचिव पदमराज जोशीले भक्तजनहरू धेरै हुँदा व्यवस्थापनमा कठिनाइ भएको स्वीकारे ।  

त्यस्तै धनगढी उपमहानगरपालिका ४ उत्तरबेहडीमा रहेको शिवपुरी धाममासमेत आज भक्तजनहरुको भिड लागेको थियो । बेहडाबाबामा जस्तै यहाँ पनि कोभिडलाई मध्यनजर गर्दै कुनै पनि सावधानी अपनाइएको थिएन । भक्तजनहरु विना मास्क सामाजिक दुरी कायम नगरी लामबद्ध थिए ।

कोभिड-१९ संकट व्यवस्थापन केन्द्र कैलालीका अध्यक्ष एवम् सहायक प्रमुख जिल्ला अधिकारी हिरालाल चौधरीले अहिलेनै मठ मन्दिरहरूमा पुजारी बाहेक अन्यलाई पुजाआजा गर्न खुला नगरिएको बताए । उनले आफूलाई समेत मन्दिरहरुमा भिडभाड बढेको जानकारी आएको बताउँदै त्यसलाई नियन्त्रण गर्न तर्फ छलफल गर्ने बताए ।