पौडेल पक्षको जिल्ला सभापतिहरूको भेला जारी, ४७ जना सहभागी भएको दाबी

काठमाडौँ - नेपाली कांग्रेसको पौडेल पक्षका जिल्‍ला सभापतिहरूको बैठक सुरु भएको छ । ठमेलस्‍थित होटल यात्रीमा बिहान १० बजेबाट जिल्‍ला सभापतिहरूको भेला सुरु भएको नुवाकोटका सभापति जगदीशनरसिंह केसीले जानकारी दिए । 

भेलामा ४७ जना सहभागी भएको केसीले दाबी गरे। ३५ जना भौतिक रूपमा र १२ जना भर्चुअल रूपमा बैठकमा सहभागी भएको उनको दाबी छ । उनले आजको बैठक साँझ पाँचसम्‍म चल्‍ने र भोलि पनि बैठक बस्‍ने जानकारी दिए । 'भेला सुरु भएको दुई घण्टा भयो,’ उनले भने, ‘भेलामा ४७ जनाको सहभागिता छ । ३५ जना भौतिक रूपमा र १२ जना भर्चुअल रूपमा उपस्थित हुनुहुन्छ ।’

आजको बैठकमा केन्द्रीय सदस्यहरू पनि सहभागी छन् । क्रियाशील सदस्यता विवाद टुंगो नलागेर समयमा महाधिवेशन नहुने भएछि आगामी रणानीति तय गर्न पौडेल पक्षले सभापति बैठक बोलाएको हो । आजै बिहानमात्रै समयमै महाधिवेशन गर्न नसकेको भन्‍दै सभापति शेरबहादुर देउवाको आलोचना गरेका थिए ।