संघीयता सखाप पार्न खोज्‍नेहरू सक्रिय भए : उपेन्द्र यादव

फाइल तस्बिर

जनकपुरधाम : जनता समाजवादी पार्टीका अध्यक्ष एवं पूर्वउपप्रधानमन्त्री उपेन्द्र यादवले स‌घीयतालाई सखाप पार्न खोज्‍नेहरू सक्रिय भएको बताएका छन् । संघीय प्रणाली समाप्त पार्न खोज्‍नेविरूध्द सम्पूर्ण गणतन्त्रवादी शक्ति एकजुट हुनुपर्ने उनको भनाइ छ ।

नेपाल बौध्दिक पेशाकर्मी महास‌ंघले गरेको कार्यक्रममा यादवले भने, 'संघीयता र गणतन्त्रविरूध्दको षड्यन्त्रलाई कुनै पनि हालतमा सफल हुन दिदैनौं ।' यादवले राज्य सञ्‍चालनका त्रुटि र संविधानको अपूर्णताका सवालमा प्रतिगमन समस्याको समाधान होइन भन्दै प्रतिगमन कहिल्यै पनि स्वीकार्य हुन नसक्ने बताए । 

मधेश जनविद्रोहको उपलब्धि संघीय गणतन्त्रको स्थापना भएकाले यसको संस्थागत विकास तथा संविधानमा भएका त्रुटिलाई संशोधन र संरचनागत परिवर्तन वर्तमानमा अपरिहार्य भइसकेको उनले बताए । संघीय सरकार संघीयताको भावविपरीत केन्द्रीकृत गर्दै सामाजिक न्यायको अधिकारलाई कटौती गर्न उद्यत हुनु विडम्वना भएको यादवको भनाइ छ । 

यादवले संघीय सरकारले सात प्रदेश कायम गरी मधेशीलगायत शोषित, पीडितलाई संरचनागत विभेद गरेको चर्चा गर्दै साझेदारी र स्वशासनको प्रत्याभूति आजको आवश्यकता भएको धारणा उनको छ । 

नेता शरतसिंह भण्डारीले संघीय सरकारले प्रदेश र स्थानीय तहलाई प्राप्त संवैधानिक अधिकारको प्रयोगमा प्रशासनिक असहयोग गरिरहेका कारण प्रदेश सरकारद्वारा कानूनी उपचारका लागि सर्वोच्च अदालतमा मुद्दा दायर गर्नु परिरहेको अवस्था चिन्ताको विषय भएको बताए । 

प्रदेश नं २ का मुख्यमन्त्री लालबाबु राउतले संघीय सरकारको असहयोग र व्यवधानविरुध्द प्रदेश सरकारले सर्वोच्च अदालतमा आधा दर्जन मुद्दा दायर गरेको स्पष्ट पार्दै प्रदेशका सबै निकायलाई गतिशील बनाउन रिक्त पदाधिकारीको नियुक्ति र चयन छिट्टै गर्ने गृहकार्यमा प्रदेश सरकार लागिपरेको जानकारी दिए ।