धादिङमा जोनसन एण्ड जोनसन खोप लगाएका ७४ वर्षीय वृद्धको मृत्यु

काठमाडौँ – धादिङमा कोभिडविरुद्धको जोनसन एण्ड जोनसनको 'जान्सिन' खोप लगाएका ७४ वर्षीय वृद्धको मृत्यु भएको छ । धादिङ स्वास्थ्य कार्यालकाअनुसार शुक्रबार साढे ११ बजे ती वृद्धले खोप लगाएका थिए । खोप लगाएको करिब तीन घण्टामा उनको मृत्यु भएको हो । दुई बजेर १५ मिनेटमा उनको मृत्यु भएको थियो ।

परिवारलाई सम्पर्क गर्दा वृद्धलाई लामो समयदेखि मधुमेह रहेको स्वास्थ्य कार्यालय धादिङका प्रमुख डा. भुवन पौडेलले बताए । खोपकै कारण मृत्यु भएको पुष्टि नभइसकेको उनले जानकारी दिए ।

जिल्लास्थित खोप समन्वय समितिको बैठक बसी उक्त व्यक्तिको कसरी मृत्यु भएको त्यसको अनुसन्धान गर्न स्वास्थ्य मन्त्रालयलयलाई अनुरोध गरिएको पौडेलले बताए । 'पोष्टमार्टम गरेपछि मात्र के कारणले मृत्यु भएको हो भन्न सकिन्छ,' उनले भने,' गम्भीर रुपमा अध्ययन गर्न अनुरोध गरिसकेका छौ ।' 

खोप कार्यक्रम दिनभर सञ्‍चालनमा आएको उनले जानकारी दिए । खोप लगाएको केही क्षणसम्म सामान्य लक्षण देखा परेको उनले जानकारी दिए । सुरुमा प्राथमिक अस्पतालमा उपचार गरिएको थियो । उनको लक्षणमा कमी नआएपछि उनलाई धादिङ जिल्ला अस्पतालमा लगिएको थियो । अस्पतालमा लगेको केही समयपछि उनको मृत्यु भएको थियो ।