पार्टी कब्जा गर्ने मनसायले मनोमानी ढंगले सदस्यता बाँडियो : डा. कोइराला

काठमाडौँ : नेपाली कांग्रेसका नेता डा. शेखर कोइरालाले पार्टीको विधान भन्दा बाहिर गएर पार्टी कब्जा गर्ने मनसायबाट मनोमानी ढंगले बाँडिएको सदस्यता कुनै पनि हालतमा स्विकार्य नहुने बताएका छन् । क्रियाशील सदस्यतामा भएको धाँधलीविरुद्ध कांग्रेस केन्द्रीय कार्यलय सानेपामा
आमरण अनसनमा बसेका धनुषा र बाराका कार्यकर्ताको गुनासो सुन्दै  डा. कोइरालाले विधानविपरीत बाडिएको क्रियाशील सदस्यता खारेज हुनु पर्ने बताए । 

डा. कोइरालाले क्रियाशील सदस्यतामा भएको धाँधलीविरुद्धको लडाइमा आफू सधैं साथमा रहेको बताए । यो लडाइमा अन्तिमसम्म साथ दिने प्रतिबद्धता डा कोइरालाले जनाए । 

कोइरालाले पार्टीको कुनैपनि तहमा बसेर  काम गर्ने पार्टीका नेता कार्यकर्तामाथि हुने अन्याय सहेर आफू बस्‍न नसक्ने बताए । 

क्रियाशील सदस्यतामा धाँधली भएको भन्दै सांसद अमरेशकुमार सिंह, संविधान सभा सदस्य डा. चन्द्रमोहन यादवसहितका नेता कार्यकर्ता केही दिनदेखि पार्टी कार्यालय सानेपामा आमरण अनसनमा बसिरहेका छन् ।