‘जलविद्युत् आयोजनाले बरुण नदीको अस्तित्व खतरामा पर्छ’

किमाथाङ्का (सङ्खुवासभा)- सङ्खुवासभाको भोटखोला गाउँपालिकामा रहेको धार्मिक एंव ऐतिहासिक महत्व बोकेको बरुण नदीबाट विद्युत् उत्पादन गर्न अनुमति दिइएकामा जिल्ला समन्वय समितिले आपत्ति जनाएको छ।

भोटखोला–४ मा निर्माण हुन लागेको १३२ मेगावाट क्षमताको जलविद्युत् आयोजनाले बरुण नदीको अस्तित्व खतरामा पर्ने भएका कारण विद्युत् प्रक्रिया अगाडि नबढाउन सम्बन्धित पक्षको ध्यानाकर्षण गराइएको जिल्ला समन्वय समितिका प्रमुख सुमन शाक्यले बताए। मकालु बरुण राष्ट्रिय निकुञ्जको आरक्ष र संरक्षण क्षेत्र भएर बग्ने बरुण नदीमा विद्युत् उत्पादक कम्पनीलाई विद्युत् उत्पादन कार्य अघि नबढाउन ऊर्जा, जलस्रोत तथा सिँचाइ मन्त्रालय, विद्युत् विकास विभाग, वन तथा वातावरण मन्त्रालय र राष्ट्रिय निकुञ्ज तथा संरक्षण क्षेत्र विभागको ध्यानाकर्षण गराइएको उनले बताए।

धार्मिक एंव ऐतिहासिक महत्व र मौलिक पहिचान तथा अलौकिक शक्ति रहेको भनिएको उक्त नदी संरक्षण हुन नसक्दा यसको महत्व गुम्ने खतरा बढेपछि विद्युत् उत्पादन रोक लगाउन माग गरिएको प्रमुख शाक्यले बताए। राष्ट्रिय निकुञ्ज र आरक्ष क्षेत्रमा विद्युत्लगायत संरचना बनाउन नपाइने उनको भनाइ छ।

भोटखोला गाउँपालिकाको १३औँ बैठकबाट धार्मिक तथा सांस्कृतिक सम्पदा क्षेत्रअन्तर्गत पर्ने बरुण नदीबाट विद्युत् उत्पादन रोक लगाउने निर्णय गरिएको थियो। सो नदीबाट बिजुली निकाल्न ऊर्जा, जलस्रोत तथा सिँचाइ मन्त्रालयले गत कात्तिक २३ गते निर्माण कम्पनीलाई अनुमति दिएको थियो। यहाँबाट बिजुली उत्पादन गर्न नदिने भन्दै स्थानीयबासीले विरोध गरेका छन्। बरुण नदी किनारमा माघ १ गते लाग्ने मकर मेला, भोट क्षेत्र र तल्लो क्षेत्रका बासिन्दाबीचमा भेटघाट गर्ने मुख्य थलोका रूपमा लिइने गरिन्छ। बरुण नदीलाई हिन्दू तथा बौद्ध धर्मावलम्बीले महत्वका साथ लिने गरेका छन्।