लागूऔषध कारोबारीलाई समात्न प्रहरीले गोली चलायो

काठमाडौँ- झापामा लागूऔषध कारोबारीलाई समात्न प्रहरीले गोली चलाएको छ ।

शनिबार दिउँसो झापाको भद्रपुर नगरपालिका–५ स्थित भित्री सडक खण्डमा शङ्कास्पद अवस्थामा हिँडिरहेका मोहम्मदर इस्लामलाई प्रहरीले नियन्त्रणमा लिन खोज्दा उनले प्रहरीमाथि आक्रमण गर्दै भाग्न प्रयास गरेपछि प्रहरीले गोली चलाएको हो ।

जिल्ला प्रहरी कार्यालय, झापा र लागूऔषध नियन्त्रण ब्यूरो, काठमाडौंको टोलीले दुई राउन्ड गोली प्रहार गरेको थियो । एक राउन्ड गोली मोहम्मदको बायाँ खुट्टाको घुँडामुनि लागेको प्रहरीले जनाएको छ । उनको नजिकै रहेको प्रादेशिक अस्पताल भद्रपुरमा उपचार भइरहेको  छ ।

इस्लामको साथबाट करिब १२० ग्राम खैरो हेरोइन बरामद गरिएको लागु औषध ब्युरोका एसएसपी कृष्ण कोइरालाले बताए ।