प्रधानमन्त्रीबाट गुरुकूलका वटुकको स्वास्थ्योपचारका लागि अक्षयकोषको घोषणा

महोत्तरी- प्रधानमन्त्री केपी शर्मा ओलीले मुलुककै जेठो विद्यालय मानिएको मटिहानी–७ स्थित राजकीय संस्कृत माध्यमिक विद्यालय (गुरुकूल)का वटुकको स्वास्थ्योपचारका लागि रु पाँच लाखको अक्षयकोष घोषणा गर्नुभएको छ । आज मटिहानीमा गुरुकूल अवलोकन गर्नुभएका प्रधानमन्त्रीले यस्तो घोषणा गरेका हुन् ।

गुरुकूलले प्राचीन भाषा र संस्कृतिको जगेर्नामा योगदान दिनुपर्ने प्रधानमन्त्रीले बताउनुभयो । वटुकहरूको स्वास्थ्योपचारका लागि अक्षयकोष खडा गर्न सल्लाह दिँदै प्रधानमन्त्रीले रु पाँच लाख सहयोगको घोषणा गरेका प्रधानाध्यापक ईश्वरी पौडेलले बताए ।

यो गुरुकूल विसं १७७५ मा स्थापना भएको मानिएको छ । यस गुरुकूलमा बालगुरु षडाननले पनि शिक्षा लिनुभएको अभिलेखबाट देखिन्छ । पहिले ब्राह्मणहरूका लागि मात्र पठनपाठन गरिने यस विद्यालयमा अब सबै जातजातिका विद्यार्थी पढ्न पाउँछन् । प्रधानमन्त्री ओली गुरुकूल पुग्नुहुँदा प्रधानाध्यापक ईश्वरी पौडेलसहित वटुकले स्वागत गरेका थिए । वटुकहरूले रुद्राभिषेक पाठ गर्दै प्रधानमन्त्रीको स्वस्तिवाचन गरेका थिए ।