हमासद्वारा युद्धविराम प्रस्तावको जवाफपछि इजरायली वार्ताकारलाई फिर्ता बोलाइयो

जेरुसेलम- इजरायलले गाजामा करिब दुई वर्षदेखि जारी विनाशकारी युद्ध अन्त्यका लागि अन्तर्राष्ट्रिय दबाब बढेपछि गाजामा हमाससँगको युद्धविरामका लागि खटाइएका वार्ताकारलाई फिर्ता बोलाएको जनाएको छ ।
 
इजरायल र हमासका प्रतिनिधिमण्डलबीच कतारमा दुई हप्ताभन्दा बढी समयदेखि मध्यस्थकर्ताबीच वार्ता भइरहेको छ, तर अप्रत्यक्ष वार्ताले अहिलेसम्म कुनै सार्थकता पाउन सकेको छैन ।

गाजा पट्टीमा २० लाखभन्दा बढी प्यालेस्टिनीहरूको दुर्दशालाई लिएर अन्तर्राष्ट्रिय चिन्ता बढ्दै गएको छ, जहाँ लडाईंले गम्भीर मानवीय सङ्कट निम्त्याएको छ र ‘ठूलो सङ्ख्यामा भोकमरी’ फैलिरहेको चेतावनी दिएको छ।

इजरायलका प्रधानमन्त्री बेन्जामिन नेतन्याहूको कार्यालयले हमासले युद्धविरामको पछिल्लो प्रस्तावमा मध्यस्थकर्तालाई जवाफ बुझाएपछि इजरायली वार्ताकारलाई परामर्शका लागि फिर्ता ल्याउन लागिएको जनाएको छ ।

नेतन्याहूको कार्यालयद्वारा जारी विज्ञप्तिमा भनिएको छ, “हामी मध्यस्थकर्ता कतार र इजिप्टको प्रयास र अमेरिकी विशेष दूत स्टिभ विटकोफको प्रयासको सराहना गर्दछौँ।”

वार्तामा संलग्न एक प्यालेस्टिनी स्रोतले एएफपीलाई बताएअनुसार हमासको प्रतिक्रियामा सहायता प्रवेशसम्बन्धी धारामा प्रस्तावित संशोधन, इजरायली सेना फिर्ता हुनुपर्ने क्षेत्रहरूको नक्सा र युद्धको स्थायी अन्त्य सुनिश्चित गर्ने ग्यारेन्टी समावेश छ।

ह्वाइट हाउसले बुधबार अमेरिकी राजदूत विटकोफले युद्धविराम प्रस्तावबारे छलफल गर्न यस क्षेत्रका ‘प्रमुख नेताहरू’सँग भेटघाट गरिरहेको जनाएको छ ।

विटकोफ बिहीबार इटालियन टापु सार्डिनियामा रहेको इजरायली सञ्चारमाध्यमले जनाएका छन् । (एएफपी)