एक व्यक्ति एक पेशा नीति लागू नगर्न माग

काठमाडौँ : रजिष्टर्ड अडिटर्सको छाता संगठन नेपाल अडिटर्स एशोसिएसन (अडान)ले परिषद्ले साउन १ गतेबाट रजिष्टर्ड अडिटरहरूको लागि एक व्यक्ति एक पेशाको नीति लागु हुने गरि सूचना प्रकाशित गरेको विषयमा आपत्ति जनाएको छ । नेपाल चार्टर्ड एकाउन्टेन्टस् संस्थाले एक व्यक्ति एक पेशा नीति लागू गर्दा पर्न सक्ने कठिनाइको सम्बन्धमा विश्लेषण नै नगरि सुचना प्रकासित हुनु दुःखद विषय भएको बताएको छ । 

अडानले विज्ञप्ति जारी गर्दै भनेको छ, ‘नेपालमा लेखापरीक्षण गर्नु पर्ने निकायहरुको तुलनामा लेखापरीक्षकहरूको संख्या न्युन छ । नेपाल चार्टर्ड एकाउन्टेन्टस्संस्थाकैपछिल्लो अध्यावधिक विवरण अनुसार संस्थामा सिओपी नविकरण गर्ने सदस्यहरुको संख्या करिव ३६०० जना रहेको छ । भने त्यसैसंस्थाले गरेको पछिल्लो अध्ययनबाट लेखापरीक्षण गरिनुपर्ने प्रालि, पब्लिक लिमिटेड, सहकारी संस्था शैक्षिक संस्था, साना तथा मझौला फर्म, राजनैतिक दल, संस्थान, राष्ट्रिय तथा अन्तराष्ट्रिय संघ संस्था र लेखापरीक्षण फर्म समेत करिव ११ लाखको संख्यामा रहेका निकायहरुको लेखापरीक्षण गर्नुपर्ने अवस्था रहेको छ ।’ 

देशका विकट स्थानहरुमा लागत र भौगोलिक कठिनाई समेतका कारण अन्यत्रबाट लेखापरीक्षक गई लेखापरीक्षण गर्न सक्ने परिस्थिति नभएको उल्लेख छ ।  नेपाल अडिटर्स एशोसिएसन (अडान) ले यो नीति लागू नगर्न पटक पटक गरिएको अनुरोध र पत्राचार समेत लाई बेवास्ता गरेको उनीहरुको बुझाइ छ ।