२ बुँदे सहमतिबारे विराटनगरमा प्रचण्डलाई प्रश्नैप्रश्न

मोरङ- नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले मुलुक र जनताको वृहत्तर हितका लागि सत्तापक्षसँग दुई बुँदे सहमति गरिएको बताएका छन् । 

आज विराटनगर विमानस्थलमा सञ्चारकर्मीहरुसँग कुरा गर्दै उनले भिजिट भिसा प्रकरणमा छानबिन गर्न समिति बनाएर जाने विषयमा सहमति गरिएको उल्लेख गरे ।

अध्यक्ष दाहालले सदनबाट निजामती र शिक्षालगायतका ऐन छिटो पारित गर्नुपर्ने भएकाले सदनको गतिरोध अन्त्य गरिएको बताए । त्यस अवसरमा उहाँले पूर्वराष्ट्रपति र पूर्वउपराष्ट्रपति फेरि राजनीतिकमा आउने सन्दर्भमा कानुन निर्माण जरुरी भएको आवश्यकता औँल्याए । 

‘प्रचण्डको एउटा पहिचान छ रे, ढाँट्दिने भनेर । अब रास्वपालाई छोड्दिएर स्वाट्टै संसद् खोल्दिनुभयो । हिजोसम्म राजीनामा नभइकन हुँदै हुँदैन त भन्नुहुन्थ्यो । के कुरामा चाहिँ सेटिङ भयो ? ’ विराटनगरमा प्रचण्डलाई पत्रकारले प्रश्न गरे । उनले सहजै जवाफ दिए- अगाडि बढ्ने र पछि हट्ने खालका कदमहरु राजनीतिमा चालिन्छ ।

भिजिट भिसा प्रकरण माओवादीले अग्नि सापकोटासँगको मुद्दासँग साट्नुभएको हो ? प्रचण्डले जवाफ दिए- 'यो बिल्कुल गलत कुरा । वाहियात कुरा हो । मानिसहरूले प्रचार गर्ने गर्या छन् । त्यस्तो केही नि होइन । यो कुरा र अग्निको कुनै साइनो सम्बन्ध छैन ।’

प्रचण्डलाई अर्को पनि प्रश्न सोधियो- ‘तपाईंलाई कांग्रेस एमालेले थाङ्नामा सुताएको कि आफैँ सुत्नुभएको हो ?’ यो प्रश्न आएपछि अलि कड्‌किएर प्रचण्डले भने- ‘तपाईंहरुको बुझाइ सुतेको हो ।’