जब मस्कले ह्वाइट हाउसमा अनुमति बिना नै स्टारलिंकको वाईफाई जोडिदिए...

वासिंगटन डिसी- अमेरिकी राष्ट्रपति डोनाल्ड ट्रम्प र अर्बपति मस्कबीचको सम्बन्धमा तिक्तता आएपछि ह्वाइट हाउसलाई लिएर ठूलो खुलासा भएको छ । 

वाशिंगटन पोस्टले स्रोतलाई उद्धृत गर्दै लेखेको छ कि जब मस्कले फेब्रुअरीमा ट्रम्पसँग मित्रता गरिरहेका थिए, त्यतिबेला स्याटेलाइट इन्टरनेट उपलब्ध गराउने उद्यमी कम्पनी स्टारलिंकले ह्वाइट हाउसमा यस्तो काम गरिरहेको थियो कि जुन कसैले कल्पना गर्न सक्दैनन् ।

खासमा मस्कको कम्पनीका मानिसहरूले ह्वाइट हाउसको छतमा चढेर स्टारलिंकको वाइफाइ स्थापना गरिदिए, त्यो पनि अनुमति बिना नै । कम्पनीले ह्वाइट हाउसको सुरक्षासँग सम्बन्धित कुनै प्रोटोकल पालना गरेको थिएन, जबकी उनीहरूलाई चेतावनी पनि दिइएको थियो। आज पनि यो वाइफाइ ह्वाइट हाउसमा रहेको छ।

अमेरिकाको राजधानी वासिङ्टनमा फेब्रुअरीको चिसो बिहान ह्वाइट हाउसका अधिकारीहरू आफ्नो दैनिक काममा व्यस्त हुँदा एक अनौठो दृश्यले सुरक्षा व्यवस्थालाई स्तब्ध बनाएको थियो । केही व्यक्तिहरू कुनै पूर्व सूचना बिना ह्वाइट हाउसको आइसेनहावर कार्यकारी कार्यालय भवनको छतमा चढेको देखियो।

उनीहरू कुनै साधारण कम्पनीका कर्मचारी नभई मस्कको स्याटेलाइट इन्टरनेट सेवा कम्पनी स्टारलिंकका कर्मचारी थिए । केही समयपछि ह्वाइट हाउसका कर्मचारी र पाहुनाहरूको मोबाइलमा “स्टारलिङ्क गेस्ट” नामको नयाँ वाइफाइ नेटवर्क पनि देखा पर्‍यो, जसले पासवर्ड मात्र सोधेको थियो।

यो वाइफाइमा न त प्रयोगकर्ता नाम थियो न त कुनै दुई कारक प्रमाणीकरण। यो घटनाले अमेरिकी सुरक्षा निकायमा तनाव सिर्जना गरिदियो । वासिङ्टन पोस्टले यो खुलासा गरेको छ । यो दावी गरिएको थियो कि ह्वाइट हाउस संचार टोलीले पहिले नै स्टारलिंकलाई सुरक्षा दृष्टिकोणबाट जोखिमपूर्ण रूपमा वर्णन गरेको थियो। तर यसका बाबजुद पनि ट्रम्प प्रशासन र डिओएजीइ अधिकारीहरूले यी चेतावनीहरूलाई सिधै अस्वीकार गरेका थिए। यति मात्र होइन, मस्क र ट्रम्पबीचको मित्रताका बेला सरकारी ठेक्का पनि स्टारलिङ्कलाई बिना कुनै हिचकिचाहट दिइयो ।

अहिले अवस्था फेरिएको छ । हालै, मस्क र ट्रम्प बीचको सम्बन्ध चिसिएको छ र अब यो भनिएको छ कि स्टारलिंकसहित मस्कका धेरै सरकारी सम्झौताहरू बर्बाद हुन सक्छन्। रिपोर्टमा यो पनि भनिएको छ कि ह्वाइट हाउस आगन्तुकहरूको फोनमा स्टारलिंकको नेटवर्क अझै पनि देखिन्छ।

यसको मतलब सुरक्षा जोखिम अझै समाप्त भएको छैन। यो सम्पूर्ण मामिलाले ट्रम्प प्रशासनको कार्यशैली र निर्णय गर्ने शैलीमा फेरि प्रश्न खडा गरेको छ । मस्कजस्ता टेक अर्बपतिले फ्री एक्सेस पाउनु प्राविधिक गल्ती मात्र होइन, बरु, यो अमेरिकाको राष्ट्रिय सुरक्षाको लागि ठूलो ‘रातो झण्डा’ हो। 

अब मस्क र ट्रम्प आमनेसामने भएकाले यो विवादले राजनीतिक आँधी आउन सक्छ।