विपद् व्यवस्थापनमा स्थानीय तह र समुदायबीच सहकार्य जरुरी छ : मुख्यमन्त्री आचार्य

दाङ – लुम्बिनी प्रदेशका मुख्यमन्त्री चेतनारायण आचार्यले मनसुनजन्य विपद्बाट हुनसक्ने क्षति न्यूनीकरणका लागि स्थानीय तह र समुदायबीच सहकार्य जरुरी रहेको बताएका छन् । आज लमही नगरपालिका–६ मध्यनगरमा आयोजित ‘हातेमालो–७’ एकीकृत अभ्यास कार्यक्रममा उनले मनसुन भित्रिएसँगै आउनसक्ने विपद्को पूर्वतयारीमा जुट्न सरोकार भएका सबैलाई आग्रह गरे ।

विपद् व्यवस्थापनमा स्थानीय तह, समुदाय तथा सरोकार भएका निकायबीच सहकार्य र समन्वय आवश्यक पर्ने बताउँदै मुख्यमन्त्री आचार्यले समुदायसँग प्रत्यक्ष जोडिएको स्थानीय सरकार सक्रिय र सर्तन रहनुपर्नेमा जोड दिए । कुनै पनि विपद् पूर्व जानकारी दिएर नआउने हुँदा तयारी अवस्थामा रहन उपस्थित सबैलाई उनले अनुरोध गरे ।

उनले भने, “मनसुनजन्य विपद्बाट हुनसक्ने सम्भावित क्षति न्यूनीकरण गर्न प्रदेश सरकार पूर्णरूपमा प्रतिबद्ध छ । यसमा सरोकार भएका निकाय, समुदाय र स्थानीय तहले समन्वय र सहजीकरण गर्नु जरुरी छ ।” तीनवटै सुरक्षा निकायलाई विपद्मा खोज तथा उद्धारका लागि आवश्यक सामग्रीको अभाव हुन नदिने उनले प्रतिबद्धता जनाए ।

कार्यक्रममा नेपाली सेना, नेपाल प्रहरी र सशस्त्र प्रहरीले विपद्का बेला खोज, उद्धार र प्राथमिक उपचार कसरी गरिन्छ भन्ने व्यवहारिक अभ्यास प्रस्तुत गरेका थिए । सुरक्षाकर्मी र रेडक्रसकर्मीले उद्धार तथा उपचारमा प्रयोग हुने सामग्रीको प्रदर्शनी गरेका थिए ।

कार्यक्रममा नेपाली सेनाका मध्यपश्चिम पृतना सुर्खेतका पृतनापति उपरथी प्रेमबहादुर पुन, लमही नगरपालिकाका प्रमुख जोगराज चौधरी, नेपाली सेना १९ नं बाहिनी अड्डा तुलसीपुरका बाहिनीपति सहायकरथी पदमबहादुर बुढा, लुम्बिनी प्रदेशका प्रमुख सचिव बाबुराम अधिकारी, दाङका प्रमुख जिल्ला अधिकारी कृष्णप्रसाद लम्साल, प्रहरी तथा सशस्त्र प्रहरीका उच्च अधिकारी, जनप्रतिनिधि, विद्यार्थी र स्थानीय नागरिकको उपस्थिति थियो ।