नेपाल स्काउटका निर्देशक भट्टराई छानबिन प्रक्रियाकै बीच क्यानाडा उडे

काठमाडौँ- नेपाल स्काउटका निर्देशक रामप्रसाद भट्टराई देश छाडेर क्यानाडा पुगेका छन्। स्रोतका अनुसार उनी २०८१ साल जेठ १ गते  त्रिभुवन अन्तर्राष्ट्रिय विमानस्थल हुँदै फिलिपिन्समार्गी क्यानाडा पुगेका हुन्।

गत २०८० चैत १ गतेदेखि नेपाल स्काउट शुद्धिकरण अभियानले भट्टराईविरुद्ध विभिन्न आर्थिक तथा नैतिक अनियमितताका आरोप लगाउँदै छानबिनको माग गर्दै आन्दोलन सुरु गरेको थियो। सोही आन्दोलनको अन्त्यमा खेलकुद मन्त्री तेजुलाल चौधरीको रोहबरमा सहमति कायम भएको थियो, जसअनुसार छानबिन समितिको प्रतिवेदन आउन्जेलसम्म उनलाई कामकाजबाट अलग राख्ने निर्णय गरिएको थियो।

तर छानबिन समितिको प्रतिवेदन सार्वजनिक नहुँदै भट्टराईलाई पुनः कार्यमा फर्काइएको थियो। अहिले उनी कार्यालयमा अनुपस्थित छन् र स्रोतका अनुसार हाल क्यानाडामा रहेका छन्।

भट्टराईमाथि नेपाल स्काउटका आन्तरिक व्यवस्थापनमा वित्तीय अनियमितता, महिला कर्मचारीहरूमाथि यौन दुर्व्यवहार, अनियमित तलबभत्ता लिने, र कार्यक्रमका नाममा व्यक्तिलाई विदेश पठाउने नाममा मानव बेचबिखनजस्ता गम्भीर आरोपहरू लागेको जनाइएको छ।

यिनै आरोपहरूका छानबिनका लागि खेलकुद मन्त्रालयकी उपसचिव रमा भट्टराईको संयोजकत्वमा ७ सदस्यीय समिति गठन गरिएको थियो। तर छानबिन समितिको प्रतिवेदन सार्वजनिक नहुँदै भट्टराईलाई कार्यमा पुनः फर्काउने निर्णय गरिएको थियो। स्रोतका अनुसार यो निर्णय तत्कालीन प्रमुख आयुक्त देवराज घिमिरेद्वारा गरिएको हो, जसमा मन्त्री चौधरीको दबाब रहेको आरोप लागिएको छ।

नेपाल स्काउटका एक कर्मचारीका अनुसार छानबिनको प्रक्रियामा रहेका एकजना उच्च पदस्थ व्यक्ति सजिलै विदेश जान सक्नु राज्यको नियमन क्षमतामाथि गम्भीर प्रश्न हो।

यसैबिच, शुद्धिकरण अभियान समितिका सदस्यहरूले छानबिन प्रतिवेदन चाँडै सार्वजनिक नभए नयाँ चरणको आन्दोलन घोषणा गर्ने तयारी गरिरहेका छन्।