लुम्बिनीमा बजेटसम्बन्धि दुई वटा अध्यादेश जारी

बुटवल - लुम्बिनीका प्रदेश प्रमुख धर्मनाथ यादवले प्रदेश सरकारको सिफारिसमा दुई वटा अध्यादेश जारी गरेका छन् । प्रदेश सरकारको शुक्रबार बिहान बसेको मन्त्रिपरिषद बैठकले गरेको सिफारिसका आधारमा प्रदेश प्रमुख यादवले अर्थ र विनियोजन अध्यादेश जारी गरेका हुन् ।

प्रदेश सरकारका आर्थिक मामिला मन्त्री बैजनाथ चौधरीका अनुसार राजकाज नै नचल्ने गरि अवरोध आएपछि अध्यादेश मार्फत बजेट ल्याउनु परेको बताए । उनले आजैबाट प्रदेशभरी भैपरि आउने खर्च र उठाउनु पर्ने राजश्व नै अन्यौलमा पर्ने अवस्था आएपछि अध्यादेश ल्याउनु परेको बताए ।

प्रदेशसभामा बजेट पास हुने अवस्था नदेखेपछि बिहीबार मुख्यमन्त्री शंकर पोखरेलको अगुवाईमा सत्तापक्ष एमालेले प्रदेशसभा बैठक बहिष्कार गरेको थियो । बजेटका सम्बन्धमा छलफलका सबै प्रक्रिया पुरा गरेर मतदानको चरणमा प्रवेश गर्नु अघि प्रदेश सरकारका मन्त्रीहरु र सांसदहरुले बैठक छाडेर हिँडेपछि शुक्रबार १ बजे सम्मका लागि सभामुख पुर्ण घर्तीले बैठक सारेका थिए ।

बजेटका लाथि थप समय मागेको सत्तापक्षले छलफलमै नबसी मध्यराती चालु अधिवेशन अन्त्य गरेको छ भने बिहनै दुई वटा अध्यादेश लागू गरेको छ ।