नेपालगञ्ज-पोखरा चार्टर्ड उडान आइतबारदेखि

फाइल फोटो

काठमाडौँ – नेपालगञ्ज-पोखरा चार्टर्ड उडान आइतबारदेखि फेरि सुरु हुने भएको छ । यसअघि गएको वर्ष चलिरहेको चार्टर्ड उडान कोभिडका कारण स्थगित भएको थियो । नाट्टा बाँके र नाट्टा कास्की च्याप्टरको समन्वयमा सुरु भएको उडान आइतबारदेखि फेरि सुरु हुन लागेको नाट्टा बाँकेका अध्यक्ष श्रीराम सिग्देलले जानकारी दिए ।

सातामा आइतबार र शुक्रबार गरी दुई दिन उडान हुनेछ । निषेधाज्ञा खुलेसँगै पोखरा घुम्न चाहने र पोखराबाट नेपालगञ्ज जान चाहने पर्यटकले एकतर्फी पाँच हजार रुपैयाँ भाडा तिरेर चार्टर्ड उडानको सेवा सुविधा लिन सक्ने नाट्टा बाँकेका अध्यक्ष सिग्देलले बताए ।

‘हामीले यसअघिदेखि नै चार्टर्ड उडान सुरु गरेका हौँ’ उनले भने, ‘कोभिडले बीचमा निषेधाज्ञा भएपछि रोकिएको थियो । अहिले अवस्था सामान्य हुन थालेपछि पर्यटक लक्षित चार्टर्ड उडान फेरि सुरु गर्न लागेका हौँ ।’

बुद्ध एयरसँग पनि नेपालगञ्ज–पोखरा सिधा उडान सुरु गर्नेबारे छलफल भइरहेको उनले बताए । यसअघि गएको चैत महिनामै बुद्ध एयरले नेपालगञ्ज–पोखरा उडान सुरु गर्ने तयारी गरेपनि कोभिडको दोस्रो लहरका कारण स्थगित गरेको थियो ।