ओलीले शुक्रबार बिहान बोलाए स्थायी समिति बैठक

फाइल तस्बिर

काठमाडौँ : एमाले अध्यक्ष केपी शर्मा ओलीले शुक्रबार बिहान स्थायी समिति बैठक बोलाएका छन् । बिहान ११ बजे तुलसीलाल स्मृति प्रतिष्ठानको कार्यालय च्यासलमा स्थायी समिति बैठक बोलाइएको हो ।

अध्यक्ष ओलीको निर्देशनमा महासचिव ईश्वर पोखरेलले स्थायी समिति बैठक बोलाएका हुन् । बैठकको तयारी गर्न महासचिव पोखरेल समाचार तयार पार्ने बेलासम्म ओली निवास बालकोटमै थिए । 

सरकारबाट बाहिरिएपछि पहिलो पटक एमालेको स्थायी समिति बैठक बस्न लागेको हो । बैठकमा वरिष्ठ नेता माधवकुमार नेपाल समूहलाई पनि बोलाइएको छ । थापाथलीस्थित पार्टी केन्द्रीय कार्यालय साँघुरो भएकाले च्यासलमा बैठक बोलाइएको एमालेले जनाएको छ ।

यसअघि दश बुँदे सम्झौता अनुमोदन गर्न असार २८ गते बोलाइएको बैठक नेताहरूको सल्लाहमा स्थगित भएको थियो । स्थायी समिति बैठकपछि तीन बजे नयाँ वानेश्वरस्थित लोत्से हलमा बोलाइएको छ ।