कोभिडविरुद्धको भ्याक्सिन जतिसक्यो छिटो नागरिकलाई उपलब्ध गराउन प्रधानमन्त्रीलाई सुझाव

तस्बिर : प्रधानमन्त्री शेरबहादुर देउवाको फेसबुकबाट

काठमाडौँ : सत्तारुढ दलका शीर्ष नेताहरूको बैठकले प्रधानमन्त्री शेरबहादुर देउवालाई कोभिड-१९ विरुद्धको खोप तत्काल नागरिकलाई उपलब्ध गराउन  सुझाव दिएका छन् । 

देउवा प्रधानमन्त्री भएपछि पहिलो पटक सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको सत्ता गठबन्धनको बैठकले बाढी, पहिरो र डुबान पीडितलाई तत्काल राहत र उद्धारको कार्यक्रम ल्याउन पनि सुझाव दिएका छन् । 

बैठकमा सहभागी नेपाली कांग्रेसका महामन्त्री पूर्णबहादुर खड्काले सैद्धान्तिक र समीक्षात्मक बैठक रहेको बताए । ‘यो सरकार बनेपछि पहिलो पटक सत्ता गठबन्धनको बैठक बसेको हो । कोभिड-१९ विरुद्धको भ्याक्सिन जतिसक्यो छिटो उपलब्ध गराउन सरकारले गरेको निर्णय कार्यान्वयनमा तिव्रता दिन शीर्ष नेताहरूले सुझाव दिनुभयो,’ खड्काले इकागजसँग भने, ‘बाढी, पहिरो र डुबानमा परेकाहरूलाई राहत र उद्धारको कार्यक्रमलाई तिव्र गतिमा अगाडि बढाउन पनि सुझाव दिनुभयो ।’ 

नयाँ सरकार गठनका लागि भएका घटनाक्रमको समीक्षा भएको पनि खड्काले बताए । बैठकमा सरकारले विश्वासको मत लिने, आज बोलाइएको संसद् अधिवेशनमा कसरी अगाडि बढ्ने र मन्त्रिपरिषद् विस्तारबारे छलफल भएको थियो । तर कुनै पनि विषयमा निर्णय भएन ।

‘मन्त्रिपरिषद् विस्तार, विश्वासको मत र संसद्लाई विजनेश दिने विषयमा सैद्धान्तिक छलफल भयो । कुनै निर्णय भएन,’ महामन्त्री खड्काले बताए । सत्ता गठबन्धनबीच कुन दलले कति मन्त्रालय लिने भन्नेमा अझै भागवण्डा भएको छैन । अहिले कांग्रेसबाट प्रधानमन्त्रीसहित दुई मन्त्री र माओवादीबाट दुई मन्त्री मन्त्रिपरिषद्मा सहभागी छन् ।

अहिलेको सत्ता गठबन्धनमा कांग्रेस, नेकपा माओवादी केन्द्र, एमालेको वरिष्ठ नेता माधवकुमार नेपाल समूह, जनता समाजवादी पार्टीको अध्यक्ष उपेन्द्र यादव समूह र राष्ट्रीय जनमोर्चा छन् । 

आजको बैठकमा एमाले वरिष्ठ नेता माधवकुमार भने सहभागी थिएनन् । प्रधानमन्त्री देउवा, माओवादी अध्यक्ष पुष्पकमल दाहाल, जनता समाजवादी पार्टी(जसपा) उपेन्द्र यादव, राष्ट्रिय जनमोर्चाका अधयक्ष चित्रबहादुर केसी र नेपाली कांग्रेसका महामन्त्री खड्का बैठकमा सहभागी थिए ।