'युथ फोर्सको दादागिरी र साइबर स्यालको गतिविधिविरुद्ध अखिल फोर्स'

काठमाडौँ : नेकपा एमालेका नेता माधव नेपाल पक्ष निकट विद्यार्थी संगठन अनेरास्ववियूले अखिल फोर्स गठन गरेको छ । अध्यक्ष ओली पक्षले युथ फोर्स पुनर्गठन गरेपछि त्‍यसलाई काउन्‍टर दिन बिहीबार नेपाल निकट अनेरास्ववीयूले अखिल फोर्स गठन गरेको हो । अनेरास्ववियुका अध्यक्ष सुदेश पराजुलीले तपेन्द्रजंग शाहीको नेतृत्वमा पाँच सय सदस्यीय अखिल फोर्स गठन गरिएको जानकारी दिए ।

'विश्वविद्यालयमा विकृति र विसंगति देखिएका छन् । ओलीले नियुक्ति गरेका पदाधिकारीले विश्वविद्यालय धरासायी बनाए,' उनले भने, 'शिक्षाको व्यापार गर्ने थलो बनाए  । त्यसको निगरानी गर्न अखिल फोर्स बनाइएको हो । त्यसविरुद्ध संघर्ष र सशक्‍त आन्दोलन गर्ने काम गर्छ अखिल फोर्सले ।'

त्‍यस्तै पार्टीभित्र देखिएको युथफोर्सको दादागिरी र साइबर स्यालको गलत गतिविधिविरुद्ध पनि अखिल फोर्सले सशक्‍त प्रतिकार गर्ने उनले बताए । 'पार्टीभित्र युथफोर्सको दादागिरी, नेताहरूप्रति विभिन्न आरोप लाउने साइबर स्यालको नाममा जुन गतिविधि गरिरहेका छन् । त्यसविरुद्ध शसक्त प्रतिकार गर्न गठन गरेका हौं। उनीहरूले गरेका गलत क्रियाकलाविरुद्ध अखिल फोर्स लाग्छ । अखिल फोर्स देशभरका क्याम्पस तथा जिल्लाहरूमा गठन गरिने उनले बताए । ओली पक्षको युवा संघले सोमबारमात्रै युथ फोर्सको पुनर्गठन गरेको थियो ।