सरकारको नीति तथा कार्यक्रम अधिनायकवादी शैलीको : ध्रुवबहादुर प्रधान

राष्ट्रिय प्रजातन्त्र पार्टी (राप्रपा) का सांसद ध्रुवबहादुर प्रधानले सरकारले सार्वजनिक गरेको आगामी आर्थिक वर्षको नीति तथा कार्यक्रम अधिनायकवादी शैलीको भएको टिप्पणी गर्नुभएको छ । संसद भवन परिसरमा सञ्चारकर्मीहरुसँग कुराकानी गर्दै सांसद प्रधानले यस्तो टिप्पणी गर्नुभएको हो ।

उहाँले सरकारले नेपाली नागरिकको मौलिक हकको समेत ख्याल नगरी कार्यक्रम अघि सारेको आरोप लगाउनु भयो । अहिले देशले भोगिरहेको समस्याहरु सम्बोधन गर्नुभन्दा पनि सरकारको दैनिकीलाई नै नीति तथा कार्यक्रममा समावेश गरिएको उहाँको टिप्पणी छ । 

उनले भने, ‘नीति तथा कार्यक्रममा केही कुराहरु नयाँ आएका छन् तर ति कार्यक्रमहरु कार्यान्वयन गर्न कति सम्भव छ भन्ने कुराहरु पनि हामीले हेर्नुपर्ने हुन्छ । सरकारको दैनिकी जस्तो कुराहरु पनि नीति तथा कार्यक्रममा समावेश ल्याएर जे गर्न खोजियो । नीति तथा कार्यक्रममा समावेश नहुनुपर्ने कुराहरु आएका छन् । समावेश गर्न आवश्यक कुराहरु समावेश गरिएको छैन । अहिले देशले भोगिरहेका समस्याहरु युवा, कृषकहरुले भोगिरहेका समस्या र तत्काल राहत उपलब्ध गराउने कुराहरु आउन सकेनन् । सरकारले अधिनायकवादी शैलीको जस्तो कुराहरु गरेर जुन ढँगले ल्याएको छ । नेपाली नागरिकको मौलिक हकलाई समेत नाघेर कुरा गर्न मिल्दैन ।’
सरकारले राष्ट्रपति रामचन्द्र पौडेलमार्फत आगामी आर्थिक वर्ष २०८२/८३ को नीति तथा कार्यक्रम संघीय संसदको संयुक्त बैठकमा प्रश्तुत गरेको छ । —न्युज एजेन्सी नेपाल