नुवाकोट वाइसीएलको निर्वाचन हुँदै, दिनेश अधिकारीको बलियो उम्मेदवार

काठमाडौँ- नेकपा (माओवादी केन्द्र) युवा संगठन वाइसीएल नेपाल नुवाकोटको निर्वाचन हुने भएको छ । जिल्ला अधिवेशनमा सहमति जुटाउन गरिएको प्रयास असफल भएपछि निर्वाचनको बाटो खोलिएको हो । निर्वाचन वैशाख २२ गते हुने निश्चित भएको छ । प्रमुख निर्वाचन अधिकृत राजाराम थपलियाका अनुसार मतदान विदुर नगरपालिका–५, पिपलटारस्थित पोष्ट बहादुर बोगटी स्मृति पार्कमा बिहान ८ बजे सुरु हुनेछ।

वैशाख १३ गते वरिष्ठ उपाध्यक्ष नारायणकाजी श्रेष्ठ ‘प्रकाश’ले उद्घाटन गरेको अधिवेशनमा प्रारम्भिक रूपमा सर्वसम्मत नेतृत्व चयन गर्ने तयारी थियो । हितबहादुर तामाङ, हिरानाथ खतिवडा लगायत नेताहरूले आफ्ना नजिकका कार्यकर्तालाई अघि सार्दा वातावरण थप जटिल भएको थियो ।

यसैबीच, केही गाउँपालिका अध्यक्षहरूले पनि संगठनमा प्रभाव जमाउने उद्देश्यले आफ्ना पक्षधर युवाहरूलाई उम्मेदवारीमा उभ्याएको भन्दै गुटबन्दीको आरोप लागेको छ।  सोही दिन निर्वाचनसम्बन्धी अन्य जानकारीहरू पनि सार्वजनिक गरिनेछ ।

यसबीच, अध्यक्ष पदका लागि दिनेश अधिकारी ‘राजा’ बलियो उम्मेदवारका रूपमा अगाडि देखिएका छन् । संगठनभित्र लामो अनुभव, कार्यकर्ताबीच लोकप्रियता, र नेतृत्व क्षमताका आधारमा उनीप्रति अपेक्षा बढेको छ ।

प्रतिनिधिहरूको उत्साह र समर्थन ‘राजा’तर्फ देखिँदै गएको छ । निर्वाचन प्रक्रिया नजिकिँदै गर्दा अब नेतृत्वको जिम्मा कसले सम्हाल्ने भन्ने अन्तिम निर्णय मत पेटिकाबाट हुने भएको छ।