सरकार र शिक्षक महासंघको वार्ता २ बजेदेखि

फाइल तस्बिर

काठमाडौँ- सरकार र आन्दोलनरत शिक्षक महासंघबीचमा आज पनि वार्ता हुँदैछ ।

हिजो राती अबेरसम्म भएको वार्ता निष्कर्षमा नपुगेपछि आज दिउँसो २:०० बजेबाट पुनः वार्ता हुन लागेको हो । सो वार्ता शिक्षा मन्त्रालयमा हुनेछ ।

नेपाल शिक्षक महासंघका महासचिव तुलाबहादुर थापाका अनुसार महासंघले प्रस्तुत गरेको ९ बुँदे प्रस्तावका बारेमा टुंगोमा पुग्ने र सोही टुंगोमा पुगेपछि पहिलो चरणमा मन्त्रिपरिषद्‌बाट निर्णय गराउने योजना रहेको छ ।

दोस्रो चरणमा भने संसद्‌बाट विधेयक पारित गराउने सर्तमा आज मन्त्रालयमा पुनः वार्ता हुन लागेको हो ।

यद्धपी वार्ता जारी रहे पनि काठमाडौँ केन्द्रित आन्दोलन भने बिहान ११:०० बजेदेखि नयाँ बानेश्वर–माइतीघर खण्डमा जारी रहेको अध्यक्ष लक्ष्मी किशोर सुवेदीले जानकारी दिए ।