भिक्षुले फोटोमा झल्काएका मुस्ताङको संस्कृति

काठमाडौँ- ऐतिहासिक, धार्मिक एवं पर्यटकीय क्षेत्र मुस्ताङको कागबेनी क्षेत्र र त्यहाँको गुम्बा संस्कृति झल्कने एकल फोटो प्रदर्शनी आयोजना गरिएको छ । फोटो पत्रकार कर्चुङ गुरुण (टासी) ले  लाजिम्पाटमा बुधबारदेखि तस्बिर प्रदर्शनी सुरु गरेका हुन् । कागबेनीस्थित ६ सय वर्ष पुरानो ‘काग छोदे गुम्बा’ को विभिन्न पक्षलाई र मुस्ताङ क्षेत्रका तस्बिरहरू यहाँ प्रदर्शन गरिएका छन् । 

भिक्षु बनेपछि टासीले फोटोग्राफी सुरु गरेका हुन् ।  उक्त क्षेत्रको नयाँ वृत्तचित्र निर्माणका क्रममा टासीले विभिन्न मुभमेन्टको फोटो खिचेका छन् । भिछु जीवनको आनन्दसँग फोटोग्राफीको कला प्रस्तुत गरिएको छ ।

पाँच दिनसम्म सञ्चालन हुने प्रदर्शनीमा एकैस्थलका १० वटा फोटो प्रदर्शनीमा राखिएका छन् । गुम्बाका शिक्षकसमेत रहेका टासीले आफू हुर्केको र शिक्षा लिएको विभिन्न क्षणलाई तस्बिरमार्फत उजागर गरेको बताए । भिक्षु लामाहरूलाई फोटोग्राफीप्रति प्रेरित गर्न फोटो प्रदर्शनी गरिएको उनको भनाई छ ।