नेपालमा ‘अन्तर्राष्ट्रिय वातावरणीय पेशाविद दिवस’ मनाइयो

काठमाडौँ- नेपालमा ‘अन्तर्राष्ट्रिय वातावरणीय पेशाविद दिवस’ सम्पन्न भएको छ । मंगलबार काठमाडौँको स्किम कलेजको सेमिनार हलमा वातावरणको क्षेत्रमा काम गर्ने सरकारी तथा गैह्रसरकारी निकाय, विश्वविद्यालय, स्वतन्त्र परामर्शदाताको रुपमा कार्यरत र सरोकारवाला निकाय तथा व्यक्तिहरूको उपस्थितिमा कार्यक्रम दिवस मनाइयो ।

प्रसिद्ध वैज्ञानिक तथा कलाकार लियोनार्दो दा भिन्चीको जन्मदिन (अप्रिल १५) को अवसर वातावरण पेशाविदले उक्त दिवस मनाउन थालेका हुन् । यो दिवस मनाउने प्रचलन अमेरिकाबाट सुरु भएको हो ।

नेपालमा पनि सन् २०२३ देखि नेपाल एशोसिएन फर इम्प्याक्ट एशेसेमेन्ट संस्थाको अगुवाइमा उक्त दिवस मनाउन थालिएको छ । आजको कार्यक्रममा करिब ५० जना व्यक्तिहरूको सहभागिता रहेको थियो ।

‘नेपालमा वातावरण सम्बन्धी पेशाकर्मीहरूको कार्यक्षेत्र अवसर र चुनौती’ विषयमा छलफल भएको थियो । सहभागीहरूले छलफलको क्रममा आ-आफ्नो विचार तथा अनुभवहरू राखेका थिए ।

छलफलमा उपेन्द्र देव भट्ट, डा. रमेशराज पन्त, प्रणव आचार्य, निरन्जन श्रेष्ठ र शर्मिला गिरी सहभागी थिए । सहजकर्ताको भूमिका अजयभक्त माथेमाले गरेका थिए । छलफलमा वातावरण सम्बन्धी पेशाकर्मीहरूको हकहितका लागि ‘लबिङ्ग’मा जोड दिनुपर्ने सबैको सहमति रहेको थियो ।

कार्यक्रमको समापन गर्दै संघका अध्यक्ष मिलन दाहालले पेशाकर्मीको क्षमता वृद्धिमा लाग्नुपर्ने साथै अग्रजलाई सम्मान र नयाँ पुस्तालाई प्रोत्साहन गर्नुपर्ने धारणा व्यक्त गरेका थिए ।