प्रधानसेनापति टेनिस प्रतियोगिता बैशाख २१ गतेदेखि काठमाडौँमा

काठमाडौँ- तेश्रो संस्करणको प्रधानसेनापति राष्ट्रिय टेनिस प्रतियोगिता आगामी बैशाख २१ गतेदेखि काठमाडौँमा आयोजना हुने भएको छ ।

नेपाली सेनाले शुक्रबार काठमाडौंमा पत्रकार सम्मेलन गर्दै तेश्रो संस्करणको प्रधानसेनापति राष्ट्रिय टेनिस प्रतियोगिता बैशाख २१ गतेदेखि २८ गतेसम्म त्रिभुवन आर्मी अफिसर्स क्लव र दशरथ रंगशालाको टेनिस कोर्टमा आयोजना हुने जनाएको हो ।

प्रतियोगितामा खुलातर्फ महिला र पुरुष गरी चार प्रतिष्पर्धा हुनेछन् भने भेट्रानतर्फ विभिन्न उमेर समूहमा सातवटा र दुई अन्तर सरकारी प्रतिष्पर्धा हुनेछ ।

खुलातर्फको बिजेताले रु ६० हजार, उपबिजेताले ३० हजार र तेश्रो हुनेले  १६ हजार रुपैया प्राप्त गर्ने सेनाले जनाएको छ । त्यस्तै भेट्रान र अन्तर सरकारीविद्याका बिजेताले नगदसहित ट्रफि र प्रमाणपत्र प्रदान गर्ने बताइएको छ । सैनिक प्रवक्ता सहायक रथी गौरव कुमार केसीले राष्ट्रिय खेलकुद क्षेत्रको बिकासमा केन्द्रीत रहेर प्रतियोगिताको आयोजना गरिएको जानकारी दिए ।

तहगत रुपमा नै प्रभावकारी योजनासहित खेलाडीहरुको दक्षता, शिप र क्षमता अभिवृद्धि गरि  उत्कृष्ठ खेलाडी उत्पादन गर्ने दृष्टिकोणका साथ नेपाल टेनिस संघको प्राविधिक सहयोगमा प्रतियोगिता हुने सेनाले जनाएको छ ।