जसपा आज देउवा नेतृत्वको सरकारमा सहभागी नहुने

काठमाडौँ : जनता समाजवादी पार्टी(जसपा) आज नेपाली कांग्रेसका सभापति शेरबहादुर देउवा नेतृत्वको सरकारमा सहभागी नहुने भएको छ । पार्टी कार्यालय बालकुमारीमा बसेको कार्यकारिणी समितिको बैठकले आज सरकारमा सहभागी नहुने निर्णय गरेको नेता महेन्द्र राययादवले जानकारी दिए । 

‘आजै हामी सरकारमा सहभागी नहुने निर्णय भएको छ,’ नेता राययादवले भने, ‘हाम्रो पार्टीका आधिकारिकता विवाद निर्वाचन आयोगमा छ । यसले सरकारमा सहभागी हुँदा असर गर्छ कि गर्दैन भनेर कानुन व्यवसायीहरूसँग छलफल गर्छौँ । त्यसपछि तय गर्छौ ।’ उनले कानुन व्यवसायीहरूले जाँदा कुनै असर गर्दैन भनेमा भोलि पनि हुन सक्ने, दुई/चार दिनपछि पनि सहभागी हुने बताए ।
    
बैठकमा संघीय परिषद् अध्यक्ष तथा पूर्वप्रधानमन्त्री डा. बाबुराम भट्टराई र अध्यक्ष उपेन्द्र यादव समूहका कार्यकारिणी समितिका काठमाडौँमा उपलब्ध सदस्यहरू सहभागी थिए । 

जसपामा एमालेलाई सहयोग गर्ने कि कांग्रेस, माओवादीसहितका दलहरू सम्मिलित गठबन्धनमा सहभागी हुनेमा विवाद छ । यादव समूहले कांग्रेस नेतृत्वको गठबन्धनलाई सघाएको थियो । 

भने अध्यक्ष महन्थ ठाकुर समूहले केपी शर्मा ओली र एमालेलाई सघाएको थियो । यही विषयमा देखिएको विवाद अहिले निर्वाचन आयोगसम्म पुगेको छ ।