तीनकुने घट्ना प्रकरणः यी हुन थप पक्राउ परेका आरोपीहरू

काठमाडौँ- तीनकुनेमा आगजनी, तोडफोड गरी राज्य विरुद्धको कसुर, आपराधिक उपद्रव लगायतका अपराध गरेको आरोपमा प्रहरीले थप ७ जनालाई पक्राउ गरेको छ । राज्य विरुद्धको कसुर र संगठित अपराध सम्बन्धी कसुर अन्तर्गत एक जना पक्राउ परेका छन् । पक्राउ पर्नेमा रुपन्देहीको देवदह नगरपालिका-९ घर भएका ४७ वर्षीय प्रेम थापा मगर रहेका छन् ।

यसैगरी, आपराधिक उपद्रव कसुर अन्तर्गत ६ जना पक्राउ परेका छन् । पक्राउ पर्नेमा झापाको गौरादह नगरपालिका-१, गौरादह घर भएका २१ वर्षीय समीर मगर, रामेछापको सुनापाति गाउँपालिका-१ घर भएका २२ वर्षीय सुरेश गौतम, ताप्लेजुङको फुङलिङ नगरपालिका-३ घर भएका २३ वर्षीय सुशील बराल छन् ।

यसैगरी, यही कसुरमा नुवाकोटको बेलकोटगढी नगरपालिका-७ घर भएका २७ वर्षीय रमेश राई, अछामको पञ्चदेवल नगरपालिका २० वर्षीय गोकर्ण शाही र संखुवासभाको पाँचखपन नगरपालिका-२ घर भई हाल काठमाडौंको कागेश्वरी मनोहरा नगरपालिका-९ बस्ने ३९ वर्षीय मुकुन्द दहाल रहेका छन् ।  

उनीहरूलाई काठमाडौं उपत्यकाको विभिन्न स्थानबाट नियन्त्रणमा लिई काठमाडौं जिल्ला अदालतबाट सात दिनको मिलान म्याद थप अनुमति प्राप्त अनुसन्धान भइरहेको जिल्ला प्रहरी परिसर काठमाडौंले जनाएको छ । राष्ट्र, राष्ट्रियता, धर्म, संस्कृती र नागरिक बचाउ महाअभियान नेपालका केन्द्रीय अध्यक्ष दुर्गा प्रसाईको नेतृत्वमा राजावादी समुहसहितको संयुक्त आन्दोलनका क्रममा उनीहरूले लुटपाट भएको थियो ।