सिरियामा जातीय हिंसामा १२ जनाको मृत्यु

बेइरुत, लेबनान- सिरियामा जातीय हिंसासम्बन्धी घटनाहरू पुनः वृद्धि हुँदै गएका छन् । सोमबार तटीय र केन्द्रीय क्षेत्रहरूमा भएका छुट्टाछुट्टै घटनाहरूमा १२ निर्दोष नागरिकको ज्यान गएको छ । सिरियन अब्जरभेटरी फर ह्युमन राइट्सका अनुसार मृतकमध्ये अधिकांश अलावाइट समुदायका रहेका छन् ।

सिरियाको सुरक्षा अवस्था अझै पनि जटिल छ । विशेष गरी इस्लामवादी नेतृत्वको बलहरूले करिब १४ वर्ष लामो गृहयुद्धपछि राष्ट्रपति बशर अल–असदको शासनलाई गत डिसेम्बरमा अन्त्य गरेपछि विभिन्न समुदायहरूबीच तनाव कायमै रहेको देखिन्छ ।

अनुगमन संस्थाका अनुसार तटीय टार्टस प्रान्तमा भएको एउटा आक्रमणमा स्थानीय अधिकारीसहित ६ जना नागरिकको ज्यान गएको छ । स्रोतहरूका अनुसार आक्रमणकारीहरू बानियास नजिकै रहेको नयाँ सरकार–समर्थित सैन्य अखडाबाट आएका थिए । प्रत्यक्षदर्शीहरूले आक्रमणकारीहरूले जातीय आधारमा धम्कीपूर्ण नारा लगाउँदै गोली प्रहार गरेको बताएका छन् ।

अलावाइट समुदायका धेरै नागरिकहरू बशर अल–असदको शासनकालमा भएको हिंसाका कारण प्रतिशोधको डर महसुस गरिरहेका छन् । यो महिनाको प्रारम्भमा पनि सिरियामा सबैभन्दा गम्भीर जातीय हिंसा देखिएको थियो, जसमा विशेष रूपमा तटीय क्षेत्रहरूमा ठूलो सङ्ख्यामा नागरिकहरू मारिएका थिए ।

केन्द्रीय शहर होम्समा अर्को दुःखद घटना घटेको छ । दुई सशस्त्र व्यक्तिले एक घरमा आक्रमण गरी त्यहाँ रहेका निर्दोष नागरिकमाथि गोली प्रहार गरेका छन् । घटनामा एक महिला र उनका तीन सन्तान (जसमध्ये एक नाबालक थिए) मारिएका छन् । त्यहाँ उपस्थित दुई जना सुन्नी मुस्लिम नागरिकको पनि घटनास्थलमै दुःखद निधन भएको छ ।

अनुगमन संस्थाका अनुसार आक्रमणकारीमध्ये एक जना सिरियाको नयाँ सुरक्षाबलसँग आबद्ध व्यक्ति थिए । घटनापछि सुरक्षा निकायहरूले अनुसन्धान अघि बढाएका छन् ।

यस घटनामा सिरियाली आधिकारिक सञ्चार माध्यमहरूले तत्काल प्रतिक्रिया दिएका छैनन् ।

सिरियन अब्जरभेटरी फर ह्युमन राइट्सका अनुसार मार्च ६ देखि सुरु भएको जातीय हिंसामा हालसम्म करिब एक हजार ७०० भन्दा बढी नागरिकको ज्यान गएको छ, जसमा ठूलो सङ्ख्यामा अलावाइट समुदायका रहेका छन् ।

सिरियाली अधिकारीहरूले हिंसाका लागि बशर अल–असदका समर्थक सशस्त्र समूहहरूलाई जिम्मेवार ठहर्याएका छन् । नयाँ सरकारको सुरक्षा बलहरूलाई लक्षित गरी भएको आक्रमणपछि सैन्य बल परिचालन गरिएको थियो ।

सिरियाका अन्तरिम राष्ट्रपति अहमद अल–शराअले निर्दोष नागरिकको हत्या गर्ने जो–कोहीमाथि कानुनी कारबाही गर्ने प्रतिबद्धता व्यक्त गरे । उनले घटनाको निष्पक्ष छानबिन गर्न विशेष अनुसन्धान समिति गठन गर्ने घोषणा गरेका छन् । 

नयाँ सिरियाली नेतृत्वले अल्पसङ्ख्यक समुदायहरूको अधिकारको रक्षा गर्ने प्रतिबद्धता जनाउँदै समावेशी शान्तिपूर्ण सङ्क्रमण सुनिश्चित गर्ने आश्वासन दिएको छ । (एएफपी)