पाकिस्तान : आत्मघाती हमलामा बसमा सवार पाँच सुरक्षाकर्मीको मृत्यु

क्वेटा (पाकिस्तान)- एक आत्मघाती कार बम हमलाकारीले आइतबार अशान्त दक्षिण–पश्चिम पाकिस्तानमा सुरक्षा बलहरू बोकेको बसहरूलाई लक्षित गर्दा कम्तीमा पाँच अधिकारीको मृत्यु र अन्य १० जना घाइते भएको प्रहरीले बताएको छ ।

बलुचिस्तानको नौशकी जिल्लामा आक्रमण भएको स्थानीय प्रहरी प्रमुख जफर जमानानीले बताए । मृतक र घाइतेहरूलाई अस्पताल लगिएको छ । घाइतेमध्ये केहीको अवस्था गम्भीर छ ।

कार बम विस्फोटपछि पृथकतावादी विद्रोहीहरूले बसहरूमा गोली चलाएको अधिकारीहरूले बताएका छन् ।

प्रतिबन्धित बलुच लिबरेसन आर्मीले आक्रमणको जिम्मेवारी लिएको छ । गत हप्ता विद्रोहीहरूले एउटा रेलमा आक्रमण गरी करिब चार सय जनालाई बन्धक बनाएका थिए । सुरक्षा बलले अपरेसन सुरु गर्नुअघि २६ जनाको मृत्यु भयो । अपरेसनका क्रममा सबै ३३ जना आक्रमणकारी मारिएका थिए ।

बलुचिस्तानका मुख्यमन्त्री सरफराज बुगतीले सुरक्षा बलले आइतबार गोली चलाएको र कम्तीमा चार जना आक्रमणकारी मारिएको बताए ।

तेल र खनिजले समृद्ध बलुचिस्तान पाकिस्तानको सबैभन्दा ठूलो र सबैभन्दा कम जनसङ्ख्या भएको प्रान्त हो । जातीय बलुच बासिन्दाहरूले लामो समयदेखि केन्द्र सरकारलाई भेदभावको आरोप लगाएका छन् । उक्त आरोपलाई इस्लामाबादले अस्वीकार गरेको छ । बलुच लिबरेसन आर्मीले केन्द्र सरकारबाट स्वतन्त्रताको माग गर्दै आएको छ । (एपी)