प्रतिपक्षी जिकीर : आफ्ना मान्छे पोस्‍ने मुख्यमन्त्री-मन्त्री लक्षित बजेट

हेटौंडा : बागमती प्रदेशको बजेट प्रदेश सभामा बहुमतबाट पारित हुने भएको छ । सरकारले प्रमुख प्रतिपक्षी माओवादी र नेपाली कांग्रेससँग छलफल गरेसँगै बजेट पास हुने भएको हो । असार १७ गतेबाट प्रदेसभा सभा स्थगित हुँदै आएको थियो । असार २७ गते सरकार र विपक्ष दल सहमति भएपछि बैठक बसेको थियो ।

प्रदेशको मुख्यमन्त्री डोरमणि पौडेलले पनि विना पूर्वाधार विद्युतीय बस खरिद नगर्ने सदनमा प्रतिबद्धता गरेका छन् । ३० वटा विद्युतीय बस खरिद गर्दा २० वटा उपत्यकाका रुटमा चल्ने भन्दै भरतपुर, हेटौंडा, धुलिखेल र काठमाडौं उपमहानगरमा चार्जिङ स्टेशन निर्माण गरिने पौडेलले बताए । उनले काठमाडौंमा स्लो चार्जर र लामो दुरीमा छिटो चार्ज हुने भइकल चार्जिङ मेशिन राखिने बताए ।

सशर्त अनुदान सप्लाईका आधारमा हुने हुँदा मागेर नपाउने स्पष्ट गरे । सदनमा मिडिया हाउस सञ्‍चालन नभएर प्रेस छापा खाना खोल्ने सरकारको कुरा ठीक भएको कांग्रेस बागमती संसदीय दलको नेता इन्द्र बानियाँले बताए ।

भौगोलिक क्षेत्रअनुसार बजेट नआएर गरिब र मजदुर तथा दलितलाई बजेटमा कतै सम्बोधन नगरेको भन्दे बानियाँले विरोध जनाए । प्रमुख प्रतिपक्ष दल माओवादीका नेता शालिकराम जम्कट्टेलले भने दलित, अपल्सङ्ख्याकलाई लक्षित नभएर नियन्त्रित बजेट आएको बताए । विद्युतीय बसको पूवार्धार र सुरुङमार्ग निर्माण उनले सदनमा विरोध गरेपनि लचकता देखाएका हुन् । उनीले सन्तुलित बजेट नआएको पनि दाबी गरे । 

सांसद न्युक्षेनारायण श्रेष्ठले भने बजेट सन्तुलन नभएको भन्दै मन्त्रीमुखी बजेट ल्याएको बताए । सांसद युवराज दुलालले सरकारले सुरुङमार्ग निर्माणमा बालजिद्धि गरेको बताए । स्वास्थ्य, शिक्षा, कृषिमा पर्याप्त बजेट विनियोजन नभएकोमा असन्तृष्टि व्यक्ति गरे । प्रदेश सरकारले नकिन्ने कोभिड खोप किन्न २ अर्ब बजेट छुट्टाएको भन्दै खर्च नहुने दुलालले ठोकुवा गरे । विद्युतीय बस खरिद गरेर जनताले गुडाउने गरी पूर्वाधार निर्माण नभई प्रदेश विद्युतीय युगमा नजाने बताए ।

सांसद हिरानाथ खतिवडाले भने मन्त्री र मुख्यमन्त्रीको निर्वाचन क्षेत्र लक्षित गरेर आफ्नो मान्छे पोस्न मात्र आएको बताए । सांसद सुरेन्द्रराज गोसाईले चौथो बजेटसम्म फेलिएर बजेट ल्याएको भन्दै समाजवादको सामान्य विन्दुमा समेत सरकार पुग्न नसकेको धारणा राखे । 

सांसद गीता वाग्ललेले चितवन महानगरको मेयरसँगको प्रतिशोधले चितवनको स्मार्ट सिटीमा बजेट नराखेकोमा असन्तुष्टि जनाइन् । प्रदेश सरकारले मेयरको प्रतिशोधले गर्दा बजेटमा नसमेटेको भन्दै नालयकी सरकारलाई लाज हुनुनपर्ने भन्दै आक्रोश उनले व्यक्त गरिन् । 

सांसद विशाल खड्काले बजेट खारेज हुनुपर्ने बताए । दलाल पुँजीवादतर्फको बाटोमा जाँदै गर्दा बजेट विभेदकारी भएको उनको ठहर छ । आफ्नो गृह जिल्ला दोलखामा बजेटको ० दशमलब ६५ प्रतिशत बजेट विनियोजन गर्दा मन्त्री र मुख्यमन्त्रीको निर्वाचन क्षेत्रमा ६५ प्रतिशतसम्म बजेट विनियोजन भएको उनले बताए ।

सांसद प्रभात तामाङले आगामी स्थानीय तहको निर्वाचन लक्षित भएको भन्दै कार्यकर्ताले माग गरेको बजेट आएको बताए । बजेटमा दिगो विकासको आधार देखिएको भन्दै पूर्ण असन्तुलित र निर्वाचन लक्षित, नीति तहमा पहिलो चरणमा प्रदेश सरकार भ्रष्टचार उन्मुख भएको बताए ।

यस्तै, प्रदेशमा आज सांसदहरुले बजेटबारे एकमुष्ठ छलफल सुरु गरेका हुन् । सांसद भावना सुवेदीले अहिलेको बजेटको उद्देश्य, इतिहाससँग लिंक तथा भविष्य पनि नभएको भन्दै समाजवाद गर्न आफूलाई लाज लागेको बताइन् । आगामी बजेट हात्ती आयो हात्ती आयो फुस्सा जस्तै भएको उनको धारणा छ । 

सांसद रजनी अमात्यले वर्षेभर बजेटको आकार बढाएर ल्याउने तर खर्च न्युन गर्ने प्रवृत्तिले विकास नहुने टिप्पणी गरिन । बामगती प्रदेश सभाका अधिकांश सांसहरुले बजेटको हरेक वर्ष जस्तै बजेटको विरोध गर्दै आएका छन् । 

सांसदहरु अधिकांश आफ्नो निर्वाचन क्षेत्र, आफ्नो स्थानीय तह, जिल्लामा मात्र कम बजेट पर्‍यो, मागेको जति बजेट नपारेको भन्दै आक्रोशित पनि छन् । मन्त्री र कार्यकर्ता पोस्नकै लागि बजेट केन्द्रित भएको सांसद दिपेन्द्र श्रेष्ठले बताए ।