न्यूरोड टिमलाई हराउँदै आयोजक केपी ओली एफसी सेमिफाइनलमा

काठमाडौं - केपी ओली एफसी जारी केपी ओली कप फुटबल प्रतियोगिताको सेमिफाइनलमा पुगेको छ ।

सोमबार एन्फा कम्प्लेक्समा सम्पन्न खेलमा केपी ओली एफसीले न्यूरोड टिमलाई १-० गोल अन्तरले पराजित गर्दै सेमिफाइनलमा पुगेको हो ।

केपी ओली एफसीले खेलको ६३ औ मिनेटमा सुरज ज्यू ठकुरीले गरेको गोल नै खेलको निर्णायक गोल बनेको थियो ।

अब सेमिफाइनलमा केपी ओली एफसीले मछिन्द्र क्लब र भुटानको ट्रान्सपोर्ट युनाइटेडबीचको खेलको विजेतासँग खेल्ने छ ।

अब मंगलबार केपी ओली कपमा दुई खेल हुनेछन् । मंगलबार पहिलो खेल एपीएफ क्लब र संकट क्लबबीच हुने छ । यो खेल बिहान साढे ११ बजे शुरु हुने छ । त्यस्तै दोस्रो खेल मछिन्द्र क्लब र भुटानको क्लब ट्रान्सपोर्ट युनाइटेडबीच हुने छ । यो खेल अपरान्ह ३ बजेदेखि शुरु हुने छ । दुवै खेल एन्फा कम्प्लेक्समा हुने छन् ।