एमाले कार्यदलको बैठक सिंहदरबारमा सुरु

काठमाडौं : सत्तारुढ दल नेकपा एमालेको आन्तरिक एकता कायम गर्न गठित कार्यदलको बैठक सिंहदरबारमा सुरु भएको छ । वरिष्ठ नेता माधवकुमार नेपाल समूहका कार्यदल सदस्यहरू कोटेश्‍वरस्थित नेपाल निवासमा छलफल गरेर फर्केपछि बैठक सुरु भएको हो । 

नेपाल समूहका सदस्यहरू कोटेश्‍वरमा गएपछि बैठक डेढ घण्टा ढिला गरी सुरु भएको हो । प्रधानमन्त्रीसमेत रहेका अध्यक्ष केपी शर्मा ओली समूहका सदस्यहरू भने सिंहदरबारमै अर्को समूहका सदस्यहरूलाई कुरेर बसेका थिए । 

कार्यदलले आजै सहमति जुटाउने दाबी कार्यदल सदस्यहरूले गर्दै आएका छन् । स्रोतका अनुसार सहमतिको मस्यौदामा हस्ताक्षर गरेर आजै स्थायी समिति बैठकमा पेस गर्ने तयारी छ । वार्ता टोलीका एक सदस्यका अनुसार पार्टीको आन्तरिक विवाद समाधानका लागि ९ बुँदामा सहमति जुटिसकेको छ । 

पछिल्लो समय एमालेको पुनःमिलन शक्ति बाँडफाडमा रोकिएको छ । वरिष्ठ नेता नेपालले अध्यक्ष मागेपछि सहमति जुट्न नसकिरहेको नेताहरू बताउँछन् । 

यता नेता नेपालले सर्वोच्च अदालतले प्रतिनिधि सभा विघटनविरुद्ध परेको रिटमा गर्ने फैसलालाई प्रभावित पार्नेगरी कुनै सम्झौता नगर्ने बताएका छन् ।