गैरआवासीय नेपाली पत्रकार महासंघ गठन

लन्डन : गैरआवासीय नेपाली पत्रकार महासंघ गठन भएको छ । प्रवासमा बसेर पत्रकारिता गरिरहेका क्रियाशील नेपाली पत्रकारहरूले महासंघ गठन गरेका हुन् । गैरआवासीय नेपाली पत्रकार महासंघ नेपाल बाहिर बेलायत, अमेरिका, क्यानडा, अष्ट्रेलिया या युरोपका कुनै एक देशमा दर्ता गरिने जनाइएको छ ।

महासंघको अध्यक्षमा बीबीसीका पूर्व पत्रकार भगीरथ योगी (यूके) चयन भएका छन् । त्यस्तै वरिष्ठ उपाध्यक्षमा तोया दाहाल (अमेरिका), उपाध्यक्षमा श्याम लुइँटेल (यूके), महासचिवमा कृष्ण केसी (अमेरिका), सचिवहरूमा अनिल अधिकारी  (अमेरिका), छत्र शंकर (अष्ट्रेलिया), खगराज गौतम (जापान), अनुजा बुढाथोकी (साउदी अरेबिया) र सह कोषाध्यक्ष महेश खाती (डेनमार्क) रहेका छन् । जुन देशमा महासंघ दर्ता हुन्छ, त्यही देशबाट कोषाध्यक्ष मनोनयन गरिने जनाइएको छ । सल्लाहकारहरूमा डा. भरत राज पौडेल (अस्ट्रेलिया) तथा डा. जगन अधिकारी (यूके) रहेका छन् ।

महासंघले ९० दिनभित्र संघको विधान बनाइने र त्यसको १८० दिनभित्र नयाँ कार्य समिति गठन गरिसक्ने अध्यक्ष योगीले बताए । योगीका अनुसार महासंघका राष्ट्रिय शाखाहरु भने तत्काल गठन गरिनेछ । 'प्रवासमा एक दशकदेखि अनलाइन साइटहरू वृद्धि भएको छ' योगीले भने 'दीगोपना र गुणस्तरमा समस्या छ । त्यसलाई समाधान गर्न लाग्‍नुपर्छ । प्रवासमा नेपाली पत्रकारितालाई अरू बढी गरिमापूर्ण र व्यावसायिक बनाउन महासंघ गठन गरिएको हो।'