रास्वपाको अवरोधबीच सभामुख घिमिरेले पेलेर अगाडि बढाए संसद्‌ बैठक

काठमाडौँ- सुरू भएलगत्तै राष्ट्रिय स्वतन्त्र पार्टी (रास्वपा)ले अवरोध गरेको संसद्‌ बैठक सभामुख देवराज घिमिरेले पेलेर अगाडि बढाएका छन् र

शुक्रबार दिउँसो १ बजेदेखि सुरू संघीय संसद्को हिउँदे अधिवेशनमा रास्वपा सांसदहरूले अवरोध गरेका थिए ।

रास्वपा सांसदहरूले बोल्नलाई समय मागिरहेका छन् । रास्वपा सांसदहरूलाई बस्न आग्रह गर्दै दलिय आधारमा बोल्न पाइने सभामुख देवराज घिमिरेले बताइरहेका थिए । तर रास्वपा सांसदहरूले अवरोध कायम राखेपछि सभामुख घिमिरेले संसद्‌ बैठक पेलेर अगाडि बढाएका हुन् ।

सचिवालयका अनुसार आजको प्रतिनिधिसभा बैठकमा सभामुखले राष्ट्रपतिबाट प्राप्त अधिवेशन आह्वान, प्रधानमन्त्रीको कार्यभार तोकिएको र प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थपसम्बन्धी पत्रको व्यहोरा पढेर सुनाउनु हुने कार्यसूची रहेको छ ।

आजको बैठकमा गत पुस २६ गते बसेको मन्त्रिपरिषदको बैठकको सिफारिसमा राष्ट्रपति रामचन्द्र पौडेलले जारी गरेका अध्यादेश प्रस्तुत हुनेछ भने सरकारले जारी गरेको अध्यादेशहरू सदनका दुवै बैठकमा प्रस्तुत हुनेछन्  ।
 
अधिवशेन सुरु भएको दिन प्रधानमन्त्री केपी शर्मा ओलीलगायत यसअघि जस्तै दलीय आधारमा शीर्ष नेताहरूले आ–आफ्नो मन्तव्य राख्ने कार्यसूची रहेको छ ।