रौतहट प्रहरीद्वारा अवैध किराना सामान बोकेका पिकअप भ्यानसहित चालक पक्राउ

रौतहट- लाखौं मूल्य बराबरको अवैध किराना सामान लोड रहेको नेपाली नम्बरको पिकअप भ्यानसहित चालकलाई रौतहट प्रहरीले पक्राउ गरेको छ। 

सीमावर्ती बजार बैरगनियाबाट २ लाख ७१ हजार ९०० मूल्य बराबरको भन्सार छलेर ल्याएको चिनी, मैदा, धनिया , रिफाईन तेल, सेवई सुपारी बोकेको प्रदेश २ ००१ च ४००० नम्बरको पिक अप भ्यान प्रहरीले बरामद गरेको हो । 

जिल्ला प्रहरी कार्यालय रौतहटबाट गएको गस्ती टोलीले बुधबार गौरस्थित बसपार्क नजिकै चेकजाँचको क्रममा अवैध सामानसहितको उक्त पिकअप गाडी नियन्त्रणमा लिएको जिल्ला प्रहरी प्रवक्ता डीएसपी दीपक कुमार रायले बताएका छन् ।

बरामद गाडी र सामानको कुल ९ लाख ७१ हजार ९०० रुपैयाँ मूल्याङकन गरी चालक गौर नगरपालिका ८ का दिनेश राउत बरैसमेत आवश्यक कारवाहीको लागि बुधबार जिल्ला भन्सार कार्यालय गौरमा बुझाइएको जिल्ला प्रहरी कार्यालयको सूचनामा उल्लेख गरिएको छ।

रौतहट प्रहरी प्रमुख एसपी दिलीप घिमिरेको निर्देशनमा जिल्लास्थित तस्करी नियन्त्रण गर्न प्रहरीले पूर्ण सक्रियता देखाएको छ ।