लामखुट्टे भगाउन बालिएको घुरबाट सल्कियो आगो, ७ घर जले

रौतहट- लामखुट्टे भगाउन बालिएको घुरबाट सल्किएर रौतहटको पूर्वीभेग राजदेवी नगरपालिका-५ स्थित पासवान टोलमा आइतबार मध्यराति भिषण आगलागी भएको छ।

आगलागीबाट आधा दर्जन बढी घर जलेर नष्ट हुँदा लाखौं मूल्य बराबरको क्षति भएको छ ।

गएराति सवा २ बजेको समयमा राजदेवी नगरपालिका-५ पताही बस्ने जगतनाथ पासवानको खरले बारेको फुसले छाएको घरमा नजिकै बालेको घुरबाट सल्किएर आगलागी भएको थियो।

आगलागी बाट बाबुलाल हजरा, रामनाथ पासवानको घर र,  ३ वटा बाख्रा  , राम सोगारथ पासवान , दिपेन्द्र पासवान , विजय पासवान, कान्ति देवी पासवान, प्रदिप पासवानलगायत ७ जनाको घर पूर्ण रूपमा जलेर नष्ट भएको प्रहरीले जनाएको छ।

आगलागीबाट सात जनाको घर जलेर ८ लाखभन्दा बढीको क्षति भएको प्रारम्भिक अनुमान गरिएको जिल्ला प्रहरी प्रवक्ता डिएसपी दीपक कुमार रायले बताएका छन् ।

आगलागी भएको खबर पाउना साथ बिओपी बेलबिछवाबाट सशस्त्र प्रहरीका सई मदन कुमार शाहको कमाण्डमा १० जना प्रहरीचौकी बसतपुरबाट असई रामलगन दासको कमाण्डमा ५ जनाको टोली, गौर नगरपलिकाको दमकल र स्थानियवासीहरुको सहयोगमा बिहान साढे ३ बजे आगो पुर्ण रुपमा नियन्त्रणमा आएको र मानविय क्षति नरहेको सशस्त्र प्रहरी रौतहटका प्रमुख एसपी बिक्रम हुमागाईंले बताएका छन् ।