मिडिया क्षेत्रलाई मर्यादित बनाउन सञ्चारमन्त्री गुरुङको आग्रह

फाइल फोटो

काठमाडौँ- सञ्चार तथा सूचनाप्रविधि मन्त्री पृथ्वीसुब्बा गुरुङले सञ्चार क्षेत्रलाई मर्यादित र व्यवस्थित बनाउन नेपाल पत्रकार महासङ्घको नवनिर्वाचित कार्य समितिलाई आग्रह गरेका छन् ।

सञ्चार मन्त्रालयमा बिहीबार महासङ्घका नव निर्वाचित पदाधिकारीहरूलाई बधाई एवम् शुभकामना दिनु हुँदै मन्त्री गुरुङले पत्रकारिता क्षेत्र स्वतन्त्र र स्वनियमन हुन आवश्यक रहेको बताए ।

नेपाल सरकारका प्रवक्ता समेत रहनुभएका मन्त्री गुरुङले लोकतान्त्रिक राज्य व्यवस्थामा सत्ता पक्षलाई खबरदारी गर्ने स्वतन्त्र निकायको रूपमा पत्रकारिता रहेको हुँदा पत्रकार स्वयम् राजनीतिकरणबाट मुक्त हुनुपर्ने धारणा राख्नुभयो । “पत्रकार राजनीतिकरणबाट मुक्त हुनुपर्छ,” उनले भने , “र स्वव्यवस्थित हुनेमा पनि जोड दिनुपर्छ ।”

पत्रकारितालाई व्यवस्थित र मर्यादित बनाउन मिडिया विधेयक बन्ने क्रममा रहेको मन्त्री गुरुङले जानकारी दिए । पत्रकारिता पेसा जोखिमपूर्ण र अस्थिर भएको औंल्याउनुहुँदै यसलाई व्यवस्थित गराउन आफू सहकार्य गर्न तयार रहेको बताए ।

मन्त्रालयका प्रवक्ता गजेन्द्रकुमार ठाकुरले पत्रकार महासङ्घका पदाधिकारीलाई बधाई दिनुहुँदै मन्त्रालय सहकार्य गर्ने प्रतिबद्धता व्यक्त गरे । सूचना तथा प्रशासर विभागका महानिर्देशक प्रदीप परियारले पत्रकारिताको हितमा सधैँ सकरात्मक रहेको बताए ।

महासङ्घका नव निर्वाचित अध्यक्ष निर्मला शर्माले पत्रकारका पेसागत चुनौतीहरू हुँदाहुँदै पनि अभिव्यक्ति स्वतन्त्रताको पक्षमा सधैँ पत्रकार महासङ्घ उभिएको बताए । पत्रकारको न्यूनतम पारिश्रमिकको समस्या, पेसागत चुनौती र शारिरीक एवम् मानसिक समस्याहरू रहेको उनले सुनाए । समय अनुसार न्युमिडियामा दक्ष पत्रकार जन्माउन प्रशिक्षणको आवश्यक भएको बताउनुहुँदै उहाँले पत्रकार महासङ्घ पत्रकारका हितमा योजनाबद्ध ढङ्गले कार्य थालनी गर्ने समेत प्रतिबद्धता व्यक्त गरे ।