एमाले कार्यदलको बैठक आज पनि बस्दै

फाइल फोटो

काठमाडौँ : सत्तारुढ नेकपा एमालेको आन्तरिक विवाद मिलाउन गठित कार्यदलको बैठक आज पनि बस्दैछ । दिउँसो एक बजे बस्ने बैठकमा हिजो भएको छलफललाई निरन्तरता दिइने नेताहरुले बताएका छन् ।

कार्यदलका सदस्य सुरेन्द्र पाण्डेका अनुसार दिउँसो बस्ने बैठकपछि मात्रै एकता टुंगोमा पुग्ने वा नपुग्ने भन्ने विषयको निक्र्योल हुनेछ । यसअघि सोमबार बसेको बैठक सकारात्मक भएपनि सहमति भइसकेको छैन । कार्यदलमा माधव नेपाल समूहबाट सुरेन्द्र पाण्डेय, घनश्याम भुसाल, रघजुी पन्त लगायत नेताहरु छन् । यस्तै ओली समूहबाट सुवास नेम्वाङ, विष्णु रिमाल लगायतका नेताहरु छन् । 

एमाले अध्यक्ष केपी शर्मा ओली समूहले भने सर्वोच्च अदालतमा प्रतिनिधि सभा विघटन विरुद्ध दर्ता गरिएको रिटमा हस्ताक्षर फिर्ता लिनुपर्ने माग गर्दै आएको छ । तर माधव नेपाल पक्ष भने जेठ २ को सहमतिमा फर्किने भएपछि मात्रै एकता सम्भव रहेको बताउँदै आएको छ ।

सोही कारण उत्पन्न विवाद मिलाउन ओली र माधव नेपाल दुवैले कार्यदल बनाएका थिए ।