किरात समुदायले टुँडिखेलमा साकेला उधौली मनाए

फाइल फाेटाे

काठमाडौँ - किरात समुदायले काठमाडौंको टुँडिखेलमा साकेला उधौली मनाएका छन् ।

किरात राई यायोक्खा काठमाडौंको आयोजनामा साकेला उधौली कार्यक्रमको आयोजना गरिएको हो । किरात समुदायमा बैशाख शुक्ल पूर्णिमाको दिन उभौली पर्व र मंसिर शुक्ल पूर्णिमाको दिन उधौली पर्व मनाउने गरिन्छ । मंसिर ३० गते मंसिर शुक्ल पूर्णिमाको दिन उधौली पर्व मनाइएपनि शनिबार भने साकेला उधौली उत्सवको आयोजना गरिएको हो । 

देशका विभिन्न जिल्लाबाट काठमाडौं आएर बसिरहेका किराती समुदायहरूले साकेला शिली नाच्दै शुभकामना आदान प्रदान गरेका थिए ।

साकेला पर्वमा परम्परागत वेशभूषामा सजिएर इष्टमित्र भेला भएर गोलो घेरामा ढोल र झ्याम्टा बजाउँदै साकेला नाच नाच्ने गरिन्छ ।

किरात समुदायले अन्नबाली भित्र्याएको खुसीयाली र चिसो बढेसँगै लेकबाट बेसी झर्ने परम्पराको सांकेतिक पर्वका रूपमा उधौली पर्व मनाउने चलन छ ।

किराती समुदाय, विशेषगरी सुनुवार, राई, लिम्बू र याख्खाहरूले मंसिर पूर्णिमाको दिनदेखि उधौली पर्व मनाउँछन् ।