सन २०२४ मा गुगलमा धेरै सर्च भएपनि खुसी भइनन् हिना खान

फाइल फाेटाे

मुम्बइ - सन् २०२४ सकिन केही दिन मात्रै बाँकी छ । 

यसैबीच गुगलले यो वर्ष सबैभन्दा धेरै खोजिएका भारतीय सेलिब्रेटीहरूको सूची सार्वजनिक गरेको छ । 

विशेष कुरा के छ भने यो लिस्टमा तीन भारतीय स्टार मात्रै परेका छन्, जसमा टिभी अभिनेत्री हिना खान, तेलुगु अभिनेता पवन कल्याण र निम्रत कौरको नाम समावेश रहेको छ ।

वास्तवमा हिना खान गुगलको २०२४ को ग्लोबल सर्च लिस्टमा पाँचौं स्थानमा छिन् । अभिनेत्रीले आफ्नो इन्स्टाग्राम स्टोरीमा २०२४ को टप सर्च लिस्टको स्क्रिनसट सेयर गरेकी छिन् । एक भावुक नोट पनि लेखेकी छिन । 

‘यो नयाँ उपलब्धिको लागि धेरैले मलाई बधाई दिइरहेका छन्, तर इमानदारीपूर्वक भन्नुपर्दा यो मेरो लागि न त उपलब्धि हो, न गर्व गर्ने कुरा हो, कसैको स्वास्थ्य समस्या वा विवादका कारण अनलाइन सर्च हुनु कुनै उपलब्धि होइन । म मेरो कडा मेहनत र उपलब्धिहरूका लागि मान्यता प्राप्त गर्न चाहन्छु, अरू कुनै कारणले होइन,’ उनले त्यसपछि लेखेकी छिन् ।

हिना खानले  ‘ये रिश्ता क्या कहलाता है’ र ‘कसौटी जिंदगी के’ जस्ता शोमा काम गरिसकेकी छिन् । यस वर्षको सुरुमा अभिनेत्रीले आफ्नो स्तन क्यान्सर भएको जानकारी दिएकी थिइन् । तर, हिनाले आफ्नो रोगसँग पूर्ण साहसका साथ लड्दैछिन् र हरेक दिन सामाजिक सञ्जालमा आफ्ना अनुभव सेयर गरिरहेकी छिन् ।

उता, दक्षिण भारतका अभिनेता पवन कल्याण ग्लोबल सर्च लिस्टमा दोस्रो स्थानमा रहेका छन्। अभिनेता तेलुगु सिनेमामा आफ्नो उत्कृष्ट अभिनयका लागि परिचित छन्। उनी अभिनेता मात्र नभएर राजनीतिज्ञ पनि हुन् । सोही वर्ष २०२४ मा उनी आन्ध्र प्रदेशको उपमुख्यमन्त्री बनेका थिए ।

 उनी भारतीय चलचित्रको दिग्दज मध्ये एक मानिन्छन् ।