संसदले गर्ने निर्णय कार्यान्वयन गर्न नसक्दा संसद सेवा प्रभावकारी हुन सकेन : राष्ट्रिय सभा अध्यक्ष

फाइल फोटो

राष्ट्रिय सभाका अध्यक्ष नारायणप्रसाद दाहालले संसदले गरेका काम र निर्णयहरू व्यवहारमा लागू गर्न नसक्दा संसद सेवा प्रभावकारी हुन नसकेको टिप्पणी गरेका छन् ।

आइतबार १८ औँ संसद सेवा दिवसको अवसरमा आयोजित कार्यक्रमलाई सम्बोधन गर्दै अध्यक्ष दाहालले संसद, सरकार र सरकारी संयन्त्रहरूले जनता राष्ट्रको हित हुनेगरी निर्णय गर्ने तर कार्यान्वयन नगर्ने प्रवृत्तिको कारणले संसदको भुमिका प्रभावकारी हुन नसकेको बताएका हुन् ।

उनले संसदको भुमिका प्रभावकारी बनाउन विगतमा गर्न नसकेका कामहरूको कारणसहित उजागर गर्न आवश्यक रहेको बताए । निर्णय गरिएका विषयहरू मिडियामा प्रचारबाजी गर्नुभन्दा व्यवहारमा लागू गर्न आवश्यक रहेको उनको भनाइ छ ।

उनले भने ‘संसदको बैठक बस्दा हामीले निर्णयहरू नराम्रा हामीले गर्दैनौँ । कम्तीमा पनि जनता र देशको हित हुने ढंगले नै हामीले निर्णयहरू गरिरहेका हुन्छौँ । नराम्रो निर्णय त हामी गर्दै गर्दैनौँ । कति राम्रो गर्छौं त्यो आफ्नो ठाउँमा छ । अनि मिडियाको अगाडि आज हामीले यो निर्णय गर्‍यौँ भनेर नि भन्छौं । मदेखि हामी सबैहरू आफूले गरेको निर्णय मैले आज यति निर्णय गर्नसके यति निर्णय कार्यान्वयन भएका छैनन् भनेर चाहिँ भन्न सक्दैनौँ । संसद प्रभावकारी रुपमा सञ्चालन नहुनुको प्रमुख समस्या यो पनि हो जस्तो मलाई लाग्छ । संसदलाई प्रभावकारी बनाउन गर्नुपर्ने आवश्यक कामहरु हामीले उजागर गर्न नसकेका कामहरु उजागर गरे मात्र सक्छौँ । निर्णय गरिएका कुरालाई प्रचारमा लाने कुरालाई भन्दा निर्णय गरेका कुरा व्यवहारमा लागू गर्न नसकेको कारणसहित गर्न नसकेका आँट र हिम्मत हामी सबैमा हुनुपर्दछ भन्ने मलाई लाग्छ । यसो गर्न सकेमात्र संसद संसदको भूमिकालाई प्रभावकारी बनाउन सकिन्छ ।’

उनले संसद चलाउने क्रममा भएका गल्तीहरू सबैले स्वीकार गर्दै भविष्यमा त्यस्ता गल्तीहरू नदोहोर्‍याउने प्रतिबद्धता गर्न आवश्यक रहेको बताए ।
कार्यक्रममा बोल्दै राष्ट्रिय सभा उपाध्यक्ष विमला घिमिरेले सांसदहरुलाई विकास निर्माणमा केन्द्रित गर्ने कि विधेयक निर्माणमा भन्ने बहस हुन आवश्यक रहेको बताए । उनले सांसदहरूसँगै संसद सेवाले काम गर्नुपर्ने भएको हिसाबले जनतासँग जोडिएको उल्लेख गर्दै विकास निर्माणसँगै कानुन निर्माणमा ध्यान दिन जरुरी रहेको बताए ।

अधिकांश सांसदहरू कानुन निर्माणभन्दा विकास निर्माणका काममा सक्रियता देखाइरहेको उल्लेख गर्दै उनले सिद्धान्त तः कानुन निर्माणमै जोड दिन आवश्यक रहेको समेत स्पष्ट पारे ।

उनले भने ‘यो संसद सेवामा कार्यपालिका र मन्त्रालयको जस्तो कर्मचारीको कामले पुग्दैन । यो सेवा प्रत्यक्ष जनतासँग जोडिएको जस्तो पनि नदेखिने तर यहाँ सबै सांसदहरूसँगै संसद सेवाले काम गर्नुपर्ने भएको हुनाले अप्रत्यक्ष हिसाबले हामी फेरि जनतासँगै जोडिएका छौं । अहिले जसरी सांसदहरूलाई विकास निर्माणमा केन्द्रित गर्ने कि विधेयक निर्माणमा भन्ने बहस बनेको छ । यसको सैद्धान्तिक पक्ष के हो भन्ने कुरा महत्वपूर्ण पक्ष हो । जनप्रतिनिधिले जितेको क्षेत्रका जनतासँग धेरै प्रतिबद्धताहरू गरेर आएको हुन्छ । विकास निर्माणमा नजोडिने कुरा त हुँदै हुँदैन । तर सिद्धान्त तः हामी कानुन निर्माण गर्छौं । कानुन निर्माणमा पनि सांसदहरू कति स्वायत्त हुन्छन् भन्ने प्रश्न पनि उठ्ने गरेको छ । निर्वाचित भइसकेपछि निर्वाचित भएपछि म यो काम गर्छु भनेर निर्वाचनमा भाग लिएको हुन्छ । उनीहरु आएपछि हाम्रो राष्ट्रिय परिस्थिति अनुकूलताको छैन होला । तर सांसदहरू खासगरि आफ्नो नीतिअनुसार विधेयकहरू निर्माण गर्नुपर्छ । यो टेक्निकल पाटो हो । तर कुन नीतिअनुसार हामी विधेयक निर्माण गरिरहेका छौं भन्ने कुरा सांसदहरूको लागि प्रमुख कुरा हुन्छ ।’

संसद सेवा भित्रका कर्मचारीहरूले संसद बैठक चलाउने, समितिका बैठकहरू सञ्चालन गर्ने र आर्थिक प्रशासनिक कामहरु गर्ने भएका कारण संसद प्रभावकारी बनाउन उनीहरूको भुमिका महत्वपूर्ण रहेको घिमिरेको भनाइ छ ।