सडक दुर्घटना न्यूनीकरणका लागि प्रभावकारी अभियानको खाँचो

सडक सवारी पीडितका सम्झनाको लागि विश्व दिवसको अवसरमा काठमाडौंमा आइतवार एक अन्तरक्रियाको आयोजना गरियो । कार्यक्रमका वक्ताहरुले सडक दुर्घटना न्यूनीकरणका लागि प्रभावकारी अभियानको खाँचो भएको भन्दै सम्वन्धित निकायको ध्यानाकर्षण गराएका छन् ।

पद्मकन्या क्याम्पसले आयोजना गरेको सो कार्यक्रममा सडक सुरक्षा विज्ञ भगवती सेढाईंले सडक सुरक्षा संवेदनशील विषय भए पनि प्राथमिकतामा नपर्नु दुखको कुरा भएको बताइन् । सडक सुरक्षा र दुर्घटनाका विषयमा कार्यपत्र प्रस्तुत गर्दै उनले विश्वभरि बर्षेनी ११ लाख भन्दा बढी मानिसले सडक दुर्घटनामा ज्यान गुमाउने गरेको जानकारी दिइन् ।

नेपाल लगायत अल्पविकसित र विकासशील देशहरुमा सडक दुर्घटनाको समस्या झनै विकराल रहेकाले दुर्घटना कम गर्नेतर्फ संस्थागत पहल हुनुपर्ने उनको भनाइ थियो । सेढाईंका अनुसार नेपालमा मात्रै सडक दुर्घटनामा ज्यान गुमाउनेको संख्या ३ हजारको हाराहारीमा छ । कार्यक्रममा ट्राफिक प्रहरी निरीक्षक हुमानन्द खनालले सडक दुर्घटना कम गर्न ट्राफिक नियमको पालनामा जोड दिए ।

पूर्ण रुपमा दुर्घटना रोक्न नसकेपनि सबैले ट्राफिक नियमको पालना गर्ने हो भने दुर्घटना न्यूनीकरण हुने र विद्यालयको पाठ्यक्रममै सडक सुरक्षाको बिषयलाई समेट्नुपर्ने उनको भनाइ थियो । काठमाडौं महानगरपालिका यातायात तथा सडक सुरक्षा विभागका सल्लाहकार जगतमान श्रेष्ठले दुर्घटना कम गर्न सडक सुरक्षा र ट्राफिक नियमको बारेमा संवेदनशील रहेको र आवश्यक सहकार्यका लागि तयार रहेको बताए ।

पद्मकन्या क्याम्पसका सहायक प्रमुख बिमला नेपाले सडक दुर्घटना भयावह रहेको भन्दै आफूहरुले त्यसको न्यूनीकरणका लागि सम्वन्धित निकायहरुसंग सहकार्य गर्न चाहेको बताइन् ।

कार्यक्रममा सडक दुर्घटना पीडित परिवारका सदस्यहरु हेरम्बराज पन्त, एन्लिा न्यौपाने लगायतको पनि उपस्थिति थियो । उनीहरुले यो विषयलाई साझा मुद्दाका रुपमा अघि बढाउन सुझाव दिएका थिए । हरेक बर्ष नोभेम्बर महिनाको तेश्रो आइतवार सडक सवारी पीडितका संझनाका लागि विश्व दिवसको रुपमा मनाइने गरिन्छ ।