भोटेकोशीमा गाडी खस्यो, निकाल्ने प्रयास जारी

सांकेतिक तस्विर

काठमाडौँ- सिन्धुपाल्चोकस्थित भोटेकोशी नदीमा आज अपराह्न गाडी खसेको छ। सिन्धुपाल्चोकको बाह्रबिसे नगरपालिका–६ स्थित बबन्डरटोलबाट गाडी भोटेकोशी नदीमा खसेको सिन्धुपाल्चोक प्रहरीले जानकारी दिएको छ । 

सिन्धुपाल्चोकका प्रहरी नायब उपरीक्षक निरञ्जन भट्टराईले गाडी हेर्दा बोलेरो जस्तो देखिएको र क्रेन ल्याएर निकाल्ने प्रयास भइरहेको जानकारी दिए । 

उनका अनुसार अपराह्न १ बजेतिर उक्त घटना भएको तर गाडी कहाँबाट कहाँ जाँदै थियो र मान्छे के-कति थिए भनेर यकिन भएको छैन। अहिले नेपाल प्रहरी, नेपाली सेना र सशस्त्र प्रहरीको टोलीले क्रेनको सहायताले गाडी नदीबाट निकाल्ने प्रयास गरिरहेका जनाइएको छ ।