संवैधानिक इजलासमा खरेलको तर्क : ह्वीप जारी नभएकाले देउवाको दाबी वैधानिक

काठमाडौँ : कानुन व्यवसायी सतिश खरेलले प्रधानमन्त्रीमा दाबी पेस गर्ने सन्दर्भमा कुनै पनि दलले ह्वीप जारी नगरेकाले नेपाली कांग्रेसका सभापति शेरबहादुर देउवाको दाबी वैधानिक भएको बताएका छन् । प्रतिनिधि सभा विघटनविरुद्ध संवैधानिक इजलासमा भइरहेको बहसमा रिट निवेदकका तर्फबाट बहस गर्दै खरेलले संसदीय व्यवस्थामा सांसदको व्यक्तिगत मत पनि हुने बताए । 

'प्रधानमन्त्रीको दाबी सन्दर्भमा न कुनै दलले ह्विप जारी गरेको छ । न ह्विपको आधारमा भोटिङ भएको छ । यसमा ह्विपको कुनै अवस्था छैन । त्यसकारण शेरबहादुर देउवाको दाबी वैधानिक छ,' खरेलको तर्क छ । उनले संसदीय व्यवस्थामा सांसदको व्यक्तिगत मत पनि हुने बताए । 

बहुदलीय व्यवस्थामा दुई प्रकारको समर्थन हुने बताए । 'बहुदलीय व्यवस्थामा भोटिङमा ह्विपको व्यवस्था हुन्छ । अर्को ह्विप नलाग्‍ने किसिमको समर्थन हुन्छ । पार्टिकुलर सदस्यको मामिलामा ह्विप लाग्दैन,' खरेलले भने ।

नेपालमा डेमोक्रेटिक दलीय व्यवस्था भएकाले एउटा मात्रै वैचारिक धारणा नभएको उनले बताए ।